Bee-moos. Imajen/Espesiál

DILI, 14 janeiru 2021 (TATOLI)—Parseiru dezenvolvimentu husi Global Partnership for Education (GPE), voluntariamente oferese apoiu fundu ho montante rihun $200 bá eskola ensinu báziku hamutuk 239 iha territóriu Timor-Leste (TL) hodi asesu ba bee moos.

Diretór Jerál Ensinu Pré-Eskolár, Ensinu Báziku no Ensinu Rekorente, Ministériu Edukasaun Juventude no Desportu (MEJD), Apolinário Serpa Rosa, hateten fundu rihun $200 ne’ebé GPE fornese ba eskola sira ne’e, direitamente entrega bá Organizasaun mundiál ba Fundu Labarik nian (UNICEF) mak jere.

Notísia Relevante:EBF Eraulu falta bee moos

“Osan sira ne’e, eskola ida-idak sei utiliza ba nesesidade bee moos. Eskola 239 ne’ebé tama iha kategoria atu hetan apoiu bee moos ne’e tanba durante ne’e la asesu duni bá bee moos,” Apolinário Serpa Rosa esplika ba jornalista Tatoli via telefone, Kinta ne’e.

Kada eskola ho ninia alokasaun orsamentu ne’ebé sei la hanesan, no eskola sira mós presiza submete proposta ba UNICEF nu’udár jestór ba orsamentu ne’e.

“Fundu rihun $200 ne’e la entrega direta ba eskola sira, maibé bainhira sira presiza bee moos, sira sei halo proposta no aprezenta ba MEJD, depois ekipa sei ba halo verifikasaun hodi halo aprovasaun,” nia subliña.

Notísia Relevante:EEB Maubara Presiza Bee-Moos no Guarda Eskola

Jornalista: Tomé Amado

Editór: Agapito dos Santos

HAKEREK NO HATÁN

Please enter your comment!
Please enter your name here