DILI, 21 fevereiru 2020 (TATOLI)—Eskola Ensinu Báziku (EB) 1,2 Maubara presiza bee-moos atu bele fasilita di’ak liután programa merenda eskolár no presiza mós guarda eskola atu tau matan ba eskola refere.

Profesór José de Deus konsidera nesesidade prinsipál rua ne’e importante no urjente tanba durante ne’e sempre hola bee-moos hodi uza tein hahan ba merenda eskolár nomós laiha guarda eskola atu bele tau matan ba fasilidade eskola, lutu, no jardín.

“Durante ne’e, ami kuru bee iha komunidade nia uma. Dala barak liu ami tenke hola bee-moos atu bele uza hodi tein ba merenda eskolár. Bee laiha, difikulta mós ami bainhira ami presiza ba nesesidade sanitáriu. Antes ne’e iha guarda eskola ida ne’ebé tau matan ba ami-nia eskola maibé guarda eskola ne’e mate tiha ona. To’o oras ne’e, seidauk rekruta foun hodi substitui,” Profesór José de Deus hato’o preokupasaun ne’e, durante diálogu entre deputadu sira ho komunidade Postu Administrativu Maubara ho tema “Rona Povu Nia Lian” ne’ebé organiza husi Organizasun Institutu Republikana Internasionál (IRI), iha salaun Parokiál Maubara, ohin.

Hatan ba preokupasaun ne’e, deputada Elvina Sousa husi bankada Partidu Demokrátiku hatán, diálogu ne’e la’ós atu fó resposta direta maibé atu rona preokupasaun hirak ne’ebé komunidade enfrenta no sei hato’o ba Governu iha Parlamentu Nasionál durante plenária iha semana oin.

“Preokupasaun ida ne’e ami lakohi atu fó resposta tanba la’ós ami-nia kompeténsia. Maibé, ami sei kontinua halo fiskalizasaun hodi identifika liután problema sira ne’ebé provu enfrenta no ami sei hato’o direta ba Governu, liuliu ministériu relevante sira atu bele buka solussun,” Elvina hateten.

Entretantu, Eskola Ensinu Báziku (EB) 1,2 Maubara, iha alunus hamutuk 548 no profesór sira hamutuk ema-na’in 18.

Deputadu ne’ebé marka prezensa iha diálogu ne’e mak hanesan deputadu Félix da Costa ho deputada Lídia Norberta husi Bankada FRETILIN, deputada Ervina Sousa husi Bankada Partidu Demokrátiku, no deputadu Leandro Lobato husi Bankada CNRT.

Partisipante sira ne’ebé partisipa iha diálogu refere mak autoridade lokál sira husi suku hitu, komunidade, profesór sira, estudante sira, autoridade seguransa, reprezentante partidu polítiku husi Postu Administrativu Maubara no Igreja.

Programa ida ne’e implementa husi Institutu Repúblikana Internasionál (IRI) ne’ebé hetan apoiu finanseiru husi povu Amarikanu liuhusi Agência dos Estados Unidos para o Desenvolvimento Internacional (USAID).

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here