Ekipa saneamentu Municipio Dili hamos hela baleta iha area Balide.Imajen/Antonio Goncalves

DILI, 14 janeiru 2021 (TATOLI)–Xefe Departamentu Saneamentu Munisípiu Dili, Domingos Soriano, hateten maske estadu emerjénsia dasiak nia la’o maibé ekipa saneamentu kontinua hala’o nia knaar hanesan raut foer iha Sidade Dili la’o ho normál.

Notísia Relevante: Ekipa Saneamentu Foti Foer Kada Loron Ida Retajen 150

“Maske Estadu dekreta tan ona Estadu Emerjénsia ba dasiak nian maibé ekipa saneamentu Munisípiu Dili nian kontinua servisu normál no kumpre regra hosi Ministériu Saúde nian,” Domingos Soriano hateten via telefónika ba Agência TATOLI, kinta ne’e.

Xefe Saneamentu ne’e hateten, bainhira ekipa saneamentu mak la tuun ba terrenu hodi raut foer mak Sidade Dili sei nakonu ho foer.

“Ami kontinua servisu normál no oras baibain, tanba ida-ne’e mak ami-nia servisu duni no ami hakarak duni Dili tenke moos no saudável,” nia dehan. 

Kona-ba EE, nia dehan ida-ne’e baibain ona tanba to’o agora EE dasiak ona no sira toman ona ho kondisaun hirak ne’e, entaun buat ida ne’ebé presiza kumpre mak regra hirak ne’ebé WHO ho MS fó sai iha EE dahuluk ne’e.

“Ita presiza mak kumpre regra EE katak halo distánsia entre metru ida no uza máskara inklui ita tenke fase liman beibeik, bainhira halo servisu ruma. Hanesan ami servisu saneamentu nian ne’ebé loron-loron raut foer, nune’e tenke kumpre,” nia hateten. 

Aleinde ida-ne’e, nia informa, ekipa saneamentu, ekipa jestaun merkadória inklui pesoál limpeza ezgotu (PLE) simu ona subsídiu liña frente iha dezembru tinan kotuk (2020).

Notísia Relevante: Laiha Estadu Emerjénsia ba Ekipa Saneamentu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here