Prezidente Autoridade Munisípiu Baucau, Olívio “Bou Lesa” Freitas, hala’o juramentu ne’ebé akompaña hosi Pároko Manuel Ximenes, SDB. Imajen espesiál.

DILI, 12 janeiru 2021 (TATOLI)–Prezidente Autoridade Munisípiu Baucau, Olivio “Bou Lesa” Freitas, hateten lideransa di’ak tenke promove no servisu makaas ho konsentrasaun, vontade, paisaun, respeitu malu, prezeveransa, ekipa ida forte, rona malu no tau-matan ba povu.

Notísia Relevante: Bou Lesa: “Hamutuk ho populasaun atu transforma Baucau sai furak liu”

“Tanba ne’e, ita tenke hatudu mós kompeténsia, korajen, jenerosidade, rezolusaun ba problema, seguransa administrativa, servidór, no valorizasaun ba servisu. Nune’e mós tenke sai lideransa ida di’ak mak apresia no valoriza servisu sira-ne’ebé servidór sira halo. Atu sai eroi ba dezenvolvimentu povu Baucau nian, ita bele kuda no haburas kualidade lideransa hirak-ne’e,” Olivio “Bou Lesa” Freitas hateten iha diskursu bainhira simu pose hosi Ministru Administrasaun Estatál, Miguel Perreira de Carvalho, iha serimónia tomada pose ba Prezidente Autoridade Munisípiu Baucau ne’ebé Agência TATOLI asesu, tersa ne’e.

Atu rezolve problema hirak-ne’e, Bou-Lesa hatete sempre buka hodi mantein servisu ba hadi’a kualidade institusionál no paisaun ba vida populasaun nian, nune’e bele  hadi’a populasaun nia kualidade moris mak tenke iha koñesimentu no kompreensaun ba povu nia nesesidade no problema bazeia ba faktu kredível ho programa ne’ebé orientadu diretamente ba povu nia moris.

Prezidente Autoridade Baucau nia esperansa mak Munisípiu Baucau atu sai furak, nia sei servisu makaas ba dezenvolvimentu, ordenamentu no jentrifikasaun (prosesu modifikasaun espasu) urbanu, dezenvolvimentu no ordenamentu Postu Administrativu no suku sira tuir faktu no evidénsia ne’ebé sei deskobre.

Ho esforsu autoridade nian, nia dehan, sei promove ordenamentu teritoriál no dezenvolve infraestrutura rurál liuhusi programa nasionál, programa munisipál, PNDS, PDIM no programa hosi parseiru dezenvolvimentu sira.

“Munisípiu Baucau realmente susar atu hetan dezenvolvimentu no progresu bainhira povu sein iha kondisaun vida digna no igualdade reál ba oportunidade. Baucau atu sai sidade referénsia ida mak autoridade munisipál tau aas dignidade umana no igualdade oportunidade. Baucau sei sai di’akliu bainhira Baucau la’o ona ho desentralizasaun no poder lokál plenamente, ninia papel nu’udar fatór loloos ba ekilíbriu, investimentu, kresimentu no progresu iha pilár dezenvolvimentu institusionál, kapitál sosiál, dezenvolvimentu infraestrutura no dezenvolvimentu ekonómiku,” nia hateten.

Dezenvolvimentu institusionál, tuir nia, foka ba padraun institusionál, dezenvolvimentu sistema no prosedimentu administrativu, jestaun rekursu umanu, jestaun orsamentu no jestaun patrimoniál.

“Maibé sei kontinua nafatin ho postura Baucau-oan seluk, bainhira ha’u-nia mandatu hotu,” nia dehan. 

Jeografikamente, Munisípiu Baucau nia laluan rai hamutuk 1.501,85 km2, kompostu husi Postu-Administrativu neen (6), Suku 59 no aldeia 281 ho total populasaun hamutuk 132.925. Jeralmente, problema prinsipál sira ne’ebé populasaun enfrenta mak ki’ak, malnutrisaun, kualidade edukasaun, kualidade prestasaun saúde, estrada, eletrisidade, bee-mos, saneamentu báziku, dezempregu, konflitu sosiál no dependénsia ba produtu eksternu.

Notísia Relevante: 14 janeiru, Prezidente Autoridade Munisípiu Baucau sei simu pose

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here