Prezidente Autoridade Munisípiu Baucau, Olívio “Bou Lesa” Freitas. Imajen/Espesiál.

DILI, 08 janeiru 2021 (TATOLI)—Vise-Ministru Administrasaun Estatál (MAE), Lino de Jesus Torrezão, hateten Prezidente Autoridade no Administradór Munisípiu parte leste hanesan Baucau, Lautém no Viqueque, nia prosesu ne’e finaliza ona no hein semana oin ne’e Ministru Administrasaun Estatál, Miguel Pereira de Carvalho, sei fó pose ba sira.

Nia hatutan, prosesu tomada de pose ba administradór no prezidente munisípiu tolu nian ne’e, dahuluk Ministru Miguel Pereira de Carvalho, sei fó pose ba Administrdór Munisípiu Lautém iha loron 11 janeiru hodi fó pose ba Administradór Munsípiu Lautem, kontinua fó pose ba Administradór Munisípiu Viqueque iha loron 12 janeiru, no Prezidente Autoridade Munisípiu Baucau sei simu pose iha 14 janeiru.

“Iha loron 11-13 janeiru semana oin ne’e, Governu liuhosi Ministru Administrasaun Estatál, Miguel Pereira de Carvalho, sei fó pose ba Administradór Munisípiu Lautém no Viqueque. Hotu tiha, ami sei fila-fali mai Dili tanba konsidensia ho Konsellu Ministru iha loron 13 janieru 2021. Ministru tenke fila mai tuir enkontru iha Konsellu Ministru. Tanba ne’e ba Prezidente Autoridade Munisípiu Baucau, enkontru Konsellu Ministru hotu mak Ministru ba fali Baucau iha loron 14 janieru 2021 hodi fó pose ba Prezidente Autoridade Munisípiu Baucau,” Lino de Jesus Torrezão ba Agência TATOLI liuhosi telefonika, sesta ne’e.

Membru Governu ne’e afirma, iha serimónia solene ne’e sei laiha atividade ida mak tama iha klaran maibé iha serimónia solene ne’e mak sei iha termu entrega dokumentu hosi Prezidente Autoridade no Administradór sesante sira ba Prezidente Autoridade no adminitradór foun sira.

“Agora sira-nia prosesu funsionamentu ne’e hanesan Prezidente Autoridade ramata ona. Bainhira Konsellu Ministru ezonera Prezidente Autoridade antes, hodi ramata nia funsaun hanesan Prezidente Autoridade,” nia dehan.

Nia esklarese, naran Administradór sira no Prezidente Autoridade Munisípiu Baucau ne’ebé simu pose mak Olívio “Bou Lesa” Freitas nuudár Prezidente Autoridade Munisípiu Baucau, Domingos Sávio nuudár Administradór Munisípiu Lautém, no Januario Soares sai Administradór Munisípiu Viqueque.

Entretantu, nia informa, kona-ba prosesu rekrutamentu ba Administradór Aileu, Ainaro no Covalima daudaun ne’e iha ona prosesu final hein de’it Ministru lori ba Konsellu Ministru (KM).

“Munisípiu tolu nian ne’e agora daudaun ita halo ona prosesu final. Hein de’it ministru lori ba iha Konsellu Ministru, atu nomea fila-fali administradór foun tanba munisípiu tolu ne’e laiha Prezidente Autoridade maibe Administrdór. Ne’ebé, atu nomeia fila-fali mak la’o tuir nia prosesu ne’ebé mak agora daudaun la’o hela ne’e,” nia informa.

Nia esklarese, totál kandidatu ba munisípiu tolu ne’ebé haruka ona ba Konsellu Ministru mak Aileu hamutuk ema na’in tolu Abel da Conceição, Agosto Manuel da Oliveira, no João Fernando Martins Borges, Munisípiu Ainaro ema na’in-neen mak Aguida judit Mendonça, Eduardo Lopes de Carvalho, Leovizildo Amaral Pereira, no Lourenço Barros Magno, no hosi Covalima hamutuk na’in haat  mak hanesan Afonso Nogueira Nahak, Albino Carvalho Lelo, Damião Amaral, no Francisco Andrade.

Enkuantu, munisípiu lima seluk hanesan Munisípiu Bobonaro, Ermera, Dili, Liquiça no Manatuto, agora atu tama ba faze ezame, tanba ne’e ohin enkotru ikus atu deside konkursu ba Prezidente Autoridade munisípiu no administradór sira.

“Ohin halo enkotru dala ikus. Ami sei deside ba konkorsu tuir mai ba Prezidente Autoridade tolu hanesan Dili, Ermera no Bobonaro no Administradór Munisípiu rua mak hanesan Munisípiu Manatuto no Covalima,” nia dehan.

Vise MAE ne’e hateten, nia prosesu agora daudaun foin mak tama ba faze dahuluk ne’ebé fó ona anunsiu hasai lista provizória ba sira-ne’ebé mak tuir ka hatama dokumentu.

“Prosesu ne’e hotu mak sei haree hasai lista definitivu ne’e no ami mós reklamasaun sira-ne’ebé mak hato’o ona reklamasaun mai,” Lino dehan.

Nia dehan, munisípiu lima naran hatama hotu tiha ona, tanba ne’e ba Dili nian atu kompete ba  Prezidente Autoridade hamtuk na’in neen eskluidu hela no na’in rua provizóriu. Ida-ne’e, nia dehan, bele define determina fila-fali ida-ne’ebé eskluidu provizóriu ne’e bele sai fali permanente no ida-ne’ebé mak eskluidu provizóriu ne’e bele sai fali esklui permanente no bele hetan determinante definitivu, no ida-ne’e mak prepara ona atu tuir ezame

“Ha’u hakarak klarifika tan lai númeru kandidatu ba prezidente munisípiu tolu no Administradór munisípiu rua nian, Liquisa na’in-neen (6). Agora, kandidatu sira-ne’ebé mak admitidu ne’e na’in-lima (5) no kandidatu ne’ebé mak provizóriamente esklui ne’e na’in-ida (1). Iha Dili kandidatu na’in-ualu (8), kandidatu admitidu na’in-haat (4), esklui provozóriu na’in-tolu (3). Munisípiu Bobonaro ninian na’in-sia (9), admitidu na’in-tolu (3), eskluidu provizóriu na’in-lima (5). Munisípiu Manatuto kandidatu na’in-12, admitidu na’in-hitu (7), eskluidu provizóriamente na’in0tolu (3) no eskluidu definitivu na’in-rua (2),”” nia informa.

Nia esplika, esklui definitivu ne’e  katak sira ne’ebé hatama dokumentu latuir dekretu Lei Governu Númeru 5/2016 nian, katak bainhira hatama dokumentu la prenxe rekezitu sira ne’e sira sei la tuir ezame.

“Agora sira ne’ebé esklui provizóriu ida-ne’e haruka sira atu kompleta tán dokumentu balu atu sai defenitivu. Ezemplu, nia tenke iha sertifikadu hanesan kursu portugés, inglés no komputadór. Maibé kandidatura sira barak liu mak ida-ne’e laiha entaun eskluidu provizóriamente. Tanba ne’e, agora fiksu hotu ona. Ita avizu ba sira atu tuir konkursu tuir mai,” nia dehan.

Tanba ne’e, nia informa ba públiku katak ba kandidatura sira-ne’ebé naran sai ona iha lista provizóriu ne’e sei tuir ezame iha loron 28-29 janeiru 2020.

“Iha loron 28 fulan ida-ne’e sei fó ezame uluk ba múnisípiu tolu ne’ebé besik malu hafoin iha loron 29 mak kontinua fó tan ezame ba munisípiu ne’ebé dook,” nia esplika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here