Vise-Ministru Administrasaun Estatál (MAE), Lino de Jesus Torrezão, no Prezidente Autoridade Munisípiu Baucau, Olivio “Bou Lesa” Freitas. Imajen/Espesiál.

DILI, 11 janeiru 2021 (TATOLI)—Prezidente Autoridade Munisípiu (PAM) Baucau, Olivio “Bou Lesa” Freitas, hateten Baucau nu’udar sidade daruak hofoin Dili entaun nia hakarak halo dezenvolvimentu ho vizaun ida foun katak hakarak halo Baucau sai sidade matak no nurak liután.

Notísia Relevante: Kandidatu na’in-neen kompete ba vaga Administradór Baucau

Olivio “Bolu Lesa” Freitas hatutan, nia parta garante katak populasaun tenke moris iha estabilidade no armonia nia laran, populasaun tenke hetan oportunidade ne’ebé hanesan atu nune’e nia hamutuk ho populasaun transforma Baucau sai furak liu munisípiu sira seluk.

“Ha’u-nia vizaun agora ne’e, ha’u garante no hakarak oinsá Baucau ne’e sai matak no nurak no populasaun tenke moris iha estabilidade no armonizasaun nia laran. Povu tenke hetan oportunidade ne’ebé hanesan atu nune’e transforma Baucau sai furak liu munisípiu hotu-hotu. Ida-ne’e ha’u-nia vizaun no misaun hodi halo implementasaun ho programa ne’ebé sustentável hodi responde ba planu estratéjiku munisípiu 2011-2030 nian,” Prezidente Autoridade Munisípiu Baucau, Olivio “Bou Lesa” Freitas, ba Agência TATOLI via telefónika, segunda ne’e.

Bou Lesa hateten, nu’udar Prezidente Autoridade Munisípiu Baucau nian, nia garante katak sei halo dezenvolvimentu ne’ebé di’ak tanba lei rasik fó dalan no lei ne’e fó kompoténsia tomak ba knaar ne’ebé tutela ba sira.

“Ita implementa buat hotu tuir lei haruka no bele haree ba planu sustentavél dezenvolvimentu nasionál. Tanba ne’e, ha’u iha esperansa katak Baucau nia dezenvolvimentu sei la’o ho di’ak,” Bou Lesa hateten.

Nia esklarese, daudaun ne’e nia parte halo hela preperasaun atu simu pose iha 12 janeiru no prosesu sai Prezidente Autoridade Munisípiu Baucau liuhosi prosesu ida naruk tanba prosesu ne’e hahú hosi kompete dokumentu tuir ezame no to’o selesaun ramata iha Konsellu Ministru (KM) mak foin selesionadu nu’udar Prezidente ba Autoridade Munisípiu Baucau nian.

“Ha’u-nia prepasaun ba simu pose, ha’u ho Administradór Munisípiu Lautém no Viqueque antes simu pose, ami sei tuir treinamentu ida bolu induzasaun jerál. Hosi treinamentu ne’e nia objetivu mak oinsá ami bele ezerse funsaun ne’ebé di’ak bainhira ami hala’o ami-nia knaar,” nia dehan.

Prezidente Autoridade Munisípiu ne’e haklaken, matéria ne’ebé sira hetan hosi teinamentu ne’e mak prinsipál liu mak matéria lideransa nian, jestaun no planu asaun, kurtu prazu no longu prazu no mós finansiamentu.

“Maske ami foin atu tama ba sistema ne’e maibé treinamentu ne’e hahú ona loke dalan ba ami, oinsá ami bele hala’o ami-nia knaar iha terrenu,” nia hateten.

Nia hatutan, planu prioridade ne’ebé sei hala’o iha nia mandatu mak daudaun ne’e sei kontinua implementa asaun ne’ebé prezidente sesante ho nia ekipa halo tiha ona antes ne’e tanba nia orsamentu aprovadu tiha ona.

“Planu dezenvolvimentu prioridade ne’e planu saida de’it ita halo tenke fó responde ba planu estratéjiku tinan anuál halo asaun ba 2011-2030. Maibé, agora daudaun atu hahú ne’e Prezidente Autoridade tenke implementa uluk lai prezidente sesante ho nia ekipa halo tiha ona antes ne’e, sei ezekuta lai no to’o marsu 2021 mak ami foin hatama planu foun tuir ami-nia vizaun no misaun,” nia dehan. 

Nia subliña, ba planu sira ne’ebé sei halo iha marsu, daudaun ne’e seidauk bele ko’alia tanba to’o iha fulan marsu mak foin halo planu.

Aleinde ida-ne’e, nia hateten, durante ne’e ema hotu hatene katak Baucau ema muturabu maibé liafuan muturabu ne’e la’os mai mesak maibé mai ho situasaun no tempu ne’ebé nia espera katak nia mandatu ba oin liafuan muturabu ne’e sei la akontese tan.

“Agora daudaun ne’e ita tama ona ba faze ida dezenvolvimenu nian. Ema hotu hakarak hadi’a nia moris. Tanba ne’e, ha’u espera katak ha’u-nia mandatu transforma uma-kain ida-idak ne’ebé konsiensia ida-ne’e iha ona Baucau tomak, nia ulun laran liuliu joven sira atu labele halo muturabu iha Baucau maibé atu halo dezenvolvimentu Baucau bele la’o,” nia dehan.

Tuir planu, Olivio ”Bou Lesa” Freitas haktuir iha loron ohin (segunda, 11 janeiru) ne’e Governu liuhosi Ministériu Administrasaun Estatál (MAE) fo pose ona ba Administradór Munisípiu Lautém no iha loron aban (tersa, 12 janeiru) sei fó pose ba Prezidente Autoridade Munisípiu Baucau.

Munisípiu Baucau kompostu hosi Postu Admministrativu neen (6) mak hanesan Postu Administrativu Baucau Vila, Vemasse, Venilale, Laga, Baguia, no Quelicai ne’ebé ninia abitante hamutuk 137.547 hosi suku hamutuk 59 no aldeia hamutuk 281 ne’ebé administrativamente sai kompeténsia ba Prezidente Autoridade Munisípal nian.

Notísia Relevante: 14 janeiru, Prezidente Autoridade Munisípiu Baucau sei simu pose

Jornalista: Osória Marques

Editór: Cancio Ximenes

1 KOMENTÁRIU

  1. Parabens ba(PAMB) ami hakarak hatoo dt katak hare netik ami povu nbe moris iha area rurais hodi nunee ami lori ami nia produtu lokal ba cidade…

HAKEREK NO HATÁN

Please enter your comment!
Please enter your name here