Plenária Parlamento Nasionál. Imajen TATOLI/Egas Cristovão.

DILI, 11 janeiru 2021 (TATOLI)–Reprezentante Povu iha uma fukun Parlamentu Nasionál, husu Governu orienta kompañia fornesedór hahan ba populasaun sira atu hadi’a mekanizmu atendimentu ba distribuisaun ai-han Cesta Bázika nian.

Notisia Relevante: Benefisiáriu Cesta Bázika hato’o keixa ba PN tanba hahan la saudável

“Ami husu Governu orienta kompañia fornesedór sira atu hadi’a mekanizmu atendimentu hosi distribuisaun ai-han Cesta bázika ne’e. Tanba, ha’u observa distribuisaun ne’e iha suku Tibar ladún di’ak tanba uluk simu $200 dollar nee simu bazea ba fixa família maibé ida agora ne’e oin seluk fali,” Deputadu Bankada CNRT, Leandro Lobato, informa liuhusi plenária Parlamentu Nasionál, segunda ne’e.

Nia dehan, distribuisaun ai-han iha Tibar ho kondisaun ladi’ak tanba ai-han balun laiha kualidade.

Asuntu hanesan levanta hosi Deputadu Bankada FRETILIN, Alexandrino Cardoso da Cruz, no husu ba Governu atu hamatan ba kompañia sira hadi’a hodi mekanizmu ba atendimentu.

“Komunidade sira ba forma durante loron tolu, atu simu dehan naran laiha lista, ida-ne’e problema. Ami husu atu hadi’a, nune’e labele haterus ita-nia povu sira,” nia fó hanoin ba Governu.

Hatán ba kestaun ne’e, Ministru Asuntu Parlamentár no Komunikasaun Sosiál, Francisco Jerónimo, hateten preikupasaun hirak ne’e nia parte sei enkamiña ba ministériu relevante sira.

NotisianRelevante: PN husu empreza sira fahe hahan saudável ba Povu

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here