Hahan la saudável ne’ebé fornese hosi empreza balun liuhosi programa Cesta Bázika ba populasaun sira. Imajen/Espesiál.

DILI, 05 janeiru 2021 (TATOLI)—Reprezentante Povu iha uma fukun Parlamentu Nasionál (PN) husu empreza ne’ebé Governu fó fiar distribui hahan Cesta Bázika tenke saudável ba povu.

Notísia Relevante: SEKoop distribui ona Cesta Bázika ba benefisiáriu 102.828 iha munisípiu-hitu

Deputadu bankada Kmanek Haburas Unidade Nacional Timor Oan (KUNTO), António Verdiál de Sousa, ne’ebé oberva programa distribuisaun hahan Cesta Bázika iha fatin balun iha territóriu nasionál nota hahaan ne’e la saudável ona.

“Programa Cesta Bázika ne’ebé fahe hahan hanesan batar, fós, manu-tolun, koto-mean, fore-keli, fore-mungu, ha’u atu hateten ai-han hirak ne’e balun ladún saudável ona. Buat hirak ne’e atan ha’u haree no observa rasik, populasaun ne’ebé akompaña dirije kedas liafuan mai ha’u hodi dehan ami povu mós iha dignidade, labele lori mak hahan kadaluarsa tiha ona fahe fali mai ami,” Deputadu António Verdiál, levanta liuhosi plenária ordinária dahuluk 2021 nian iha Parlamentu Nasionál, tersa ne’e.

Nune’e mos deputada bankada CNRT, Virgínia Ana Bela, ejize Governu tenke toma atensaun sériu ba implementasaun programa ne’e nune’e labele sakrífika povu.

Tuir nia, programa Cesta Bázika ne’e la’ós povu mak ejize hahan ba Governu maibé Governu hakarak fó ba povu entaun tenke fó hahan ne’ebé di’ak no saudável.

“Talvez bele ajuda sira tanba ita fó buat ruma ba sira. Maibé kualidade ba sasán distribuisun sira-ne’ebé iha, barak tebes la prenxe kritériu atu-bele fó saúde di’ak ba povu,” nia dehan.

Entretantu, Deputadu Bankada KHUNTO, Luis Roberto, hateten povu sempre krítika implementasaun programa Cesta Bázika to’o iha terrenu tanba hahan ne’e laiha kualidade.

Vise-Prezidente Parlamentu Nasionál ne’e fó hanoin ba Governu atu hai’a jestaun iha implementasaun programa refere nune’e ba futuru labele repete tán.

“Problema mak ne’e, hahan ne’ebé empreza sira fahe ba populasaun sira la tuir presu no aat liu maka hahaan laiha kualidade. Ne’ebe, ha’u husu Governu atu hadi’a jestaun ida-ne’e,” nia fó haoin ba Governu.

Nune’e mós deputadu Bankada FRETILIN, David Dias Ximenes husu ba Governu atu toma medida ba implementasaun refere tanba povu presiza hahan ne’ebé saudável.

Entretantu Ministru Asuntu Parlamentár no Komunikasaun Sosiál, Francisco Jerónimo, sei enkamiña hosi reprezentante povu sira nia preokupasaun ne’e ba ministériu relevante hodi fó alarma ba kompañia ka empreza sira-ne’ebé distribui programa cesta bázika ne’e.

Notísia Relevante: CAC kontinua analiza informasaun Cesta Bázika “fuhuk”

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here