Benefisiáriu Suku Komoro, José da Costa dos Santos. Imajen TATOLI/Evaristo Soares Martins.

DILI, 06 janeiru 2021 (TATOLI)–Benefisiáriu ba hahan programa Cesta Bázika hosi Aldeia Fomento II, Suku Comoro, Postu Administrativa Don Aleixo, Munisípiu Dili,  José da Costa dos Santos, ohin, lori no lalin hahan hanesan na’an-manu no ikan la saudável ne’ebé nia simu hodi hato’o keixa ba Parlamentu Nasionál.  

Notísia Relevante: PN husu empreza sira fahe hahan saudável ba Povu

José da Costa dos Santos, hato’o keixa ba Komisaun D ne’ebé trata asuntu Ekonomia no Dezenvolvimentu iha Parlamentu Nasionál.

“Razaun, ohin, ha’u mai Parlamentu Nasionál iha komisaun D, tanba sasán horisehik ami simu ba moras COVID-19 nian iha Supermerkadu Leader. Ha’u-nia oan ba simu iha tuku 11.00 to’o fali tuku 15.00 lorokraik foin lori sasán sira-ne’e fila ba uma. Depois to’o iha uma, loke haree sasán sira-ne’ebé ami simu ne’e, na’an ho ikan ne’e dois hotu. Entaun, ohin, ha’u lori mai hato’o keixa iha Parlamentu Nasionál,” José da Costa dos Santos informa ba jornalista sira hafoin hato’o keixa ba iha Komisaun D.

Sasán hirak-ne’e José ninia oan rasik mak tama ba iha loja laran hili rasik maibé hili buat ne’e mai to’o iha uma hatún es batu nabeen hotu no horon ba na’an no ikan mak komesa dois ona. 

“Ha’u-nia oan sira rasik tama ba hili sasán sira-ne’e iha loja laran, hili buat ne’e mai to’o iha uma hatún es batu nabeen hotu no horon ba na’an no ikan mak komesa dois sai mai ona. Entaun moras seidauk oho ita, buat sira-ne’e mak mai oho uluk ita ona. Agora ita ba simu hahán sira- ne’e atu aumenta ita- nia isin maibé simu fali buat dodok ne’e mai atu estraga tán ita-nia saúde,” nia dehan. 

Nia parte deside hahán Cesta Bázika hanesan na’an no ikan ne’ebé dois ne’e hatudu ba deputadu sira hodi husu responsabilidade ba Governu no kompañia.

Benefisiáriu hosi Suku Comoro, kuarta ne’e keixa hahán cesta bázika ne’ebé la saudável ba Parlamentu Nasionál. Imajen TATOLI/Evaristo Soares Martins.

Entretantu, Prezidente Komisaun D (Ekonómia no Dezenvolvimentu), Deputsdu Antoninho Bianco, hateten keixa kona-ba sasán Cesta Bázika nian tanba tuir informasaun ne’ebé benefisiáriu ne’e hato’o simu hosi loja Leader no lori ba uma dehan sasán hanesan ikan ho na’an dois hotu.

“Ohin sira mai hato’o sira-nia preokupasaun kona ba ikan ho na’an ne’ebé sira simu horisehik ne’e dehan iis tiha ona. Maibé ita haree iha Dili ne’e la’ós ema fahe hanesan iha foho. Iha Dili ne’e ida-idak lori surat-tahan ba foti iha loja boot sira. Hanesan ohin katuas eplika ninia oan feto mak tama ba iha loja laran hodi hili sasán sira-ne’e, klaru nia hili ida-ne’ebé di’ak. Dezde horisehik kedas lori ba iha uma mak laiha zalera laiha karik buat ne’e bele dois,” nia dehan.

Bianco afirma, horisehik fahe sasán Cesta Bázika ne’e mos CAC, PDHJ, ONG sira no autoridade lokál akompaña prosesu distribuisaun iha loja refere.

“Haree sasán ladi’ak nusá lakohi hato’o ba autoridade sira-ne’ebé prezensa iha-ne’ebá atu nune’e loja na’in bele troka kedas. Kuandu haree dehan sasán sira-ne’e ladi’ak maibé depois lori ona uma mak ohin foin mai hato’o fali keixa iha Parlamentu,” nia hateten. 

Maibé, nia dehan, nu’udar reprezentante povu bainhira komunidade mai hato’o keixa, komisaun prontu apontamentu keixa ne’e, maibé to’o agora komisaun foin primeira vez simu keixa hosi komunidade.

Notísia Relevante: Presiza halo avaliasaun regulár ba implementasaun programa Cesta Bázika

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here