Prezidente Autoridade Munisípiu Baucau, António Augusto Guterres

DILI, 30 setembru 2020 (TATOLI)–Prezidente Autoridade Munisípiu Baucau, António Guterres, informa kandidatu ba Administradór Munisípiu Baucau na’in-neen (6) mak kompete maibé kandidatu ida la liu selesaun dokumentu tanba kandidatu refere ne’e idade sei kiik no kandidatu na’in-lima (5) seluk mak liu selesaun dokumentu.

Notísia Relevante: MAE halo ona ezame ba kandidatu administradór munisípiu tolu

“Hosi Baucau, ita iha kandidatu na’in-neen (6) mak konkorre maibé kandidatu ida la liu selesaun dokumentu. Entaun, kandidadtu nain-lima (5) mak konkorre ba vaga Administradór nian ne’ebé mak Ministériu Administrsaun Estatál anúnsia ona,” dehan Prezidente Autoridade Munisípiu Baucau ba Agência TATOLI via telefónika, kuarta ne’e. 

Kandidatu sira-ne’e mak hanesan Eis Diretór Agrikultura no Eis Membru Parlamentu Nasionál Domingos Ribeiro alias “Kiik-Oan”, Sekretáriu Munisipál Atuál, Maria Celestina Viegas, Luis Aparício Guterres, Olivio “Bou-Lesa” Freitas, no Secondinho Morreira.

Tuir nia, kandidatu na’in-lima (5) ne’e mesak funsionáriu públiku iha Munisípiu Baucau.

Prezidente ne’e hatete aplikasaun no avaliasaun liu hotu ona no ezame eskrita mós liu tiha iha 28 setembru foin segunda liubá ne’e, no hein de’it ona koresaun hosi ekipa relevante bainhra hotu mak bele anúnsia ba públiku.

“Matéria ne’ebé mak fó ba kandidatura sira-ne’e mak haree liu ba planu estratéjiku dezenvolvimentu nasionál,” nia dehan.

Notísia Relevante: Semana oin, administradór no prezidente autoridade sei tuir ezame

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here