Abro Fernandes (liman-kuana). Imajen/Espesiál.

DILI, 11 janeiru 2021 (TATOLI)—Horisehik mehi atu semo no figth iha singapura iha 11 dezembru 2020 kanseladu tanba COVID-19 no hala’o de’it auto-kuarentena iha Solo-Java Sentrál-Indonezia, iha fulan janeiru 2021 ne’e mehi foun ida nafunan hodi lori hikas Luta Na’in Mixed Martial Arts (MMA) Lafaek Timor-Leste, Abro Fernandes, ba figth iha One Championship Coallision Courrse-2 iha Singapura iha loron 22 fulan janeiru. 

Notísia Relevante: La konsege ba Singapura, Abro Fernandes halo auto-kuarentena iha Solo

Abro Fernandes. Imajen/Espesiál.

Maske COVID-19 nani habelar ba rai-rai maibé Asswa’in no eroi Timor-Leste ne’e sei lori bandeira Repúblika Demokrátika Timor-Leste (RDTL) hodi dada sa’e iha Singapura. Nia sei hamorin Timor-Leste nia naran liuhosi Mixed Martial Arts (MMA) ne’ebé nia hahi no hanai durante ne’e hodi kontra-hasoru fighter iternasional ida naran Roshan Mainam hosi India.

“Komisaun organizadora ba eventu ne’e konvida ha’u atu ba Singapura hodi ba tuir figth hasoru fighter hosi India naran Roshan Mainam hosi India iha 22 janeiru 2021 be mai. Iha eventu ne’e aleinde ha’u lori bandeira Indonézia nian, ha’u mós lori bandeira Timor-Leste atu dada sa’e iha Singapura hodi hamorin mós Timor-Leste nia naran,” Luta Na’in Mixed Martial Arts (MMA) Lafaek Timor-Leste, Abro Fernandes, hateten ba Agência TATOLI liuhosi WhatsApp (WA), segunda ne’e.

Iha esperansa bele manan no hamorin TL nia naran ka lae, Abro hatán, ba Timor-Leste nia naran ne’e nia sei luta ho fuan ho beran tomak ne’ebé nia iha atu bele oferese vitória ba povu no rai doben Timor-Leste liuhosi preparasaun sira-ne’ebé durante ne’e nia homan rasik.

Abro Fernandes. Imajen/Espesiál.

“Ha’u-nia preparasaun ne’e la’os bainhira atu ba figth mak ha’u prepara no treinu. Maibé, loro-loron ne’e ha’u treinu hela de’it. Entaun, ha’u iha esperansa bele manan ha’u-nia adversáriu sira maske tenke liuhosi luta ida-ne’ebé presiza enerjia no konsentrasaun ida-ne’ebé estra. Ha’u fiar aan bele manan tanba ha’u hatene ona ha’u-nia adversáriu nia frakeza. Ha’u sei esforsu aan atu manan no bele manan liuhosi tekniku “tuku malu iha leten” ka “stand up figth”. Tanba, ha’u haree nia fraku hela,” nia dehan ho fiar aan.

Atu ba Singapura, nia dehan, iha loron 15 fulan janeiru ne’e nia parte sei halo teste liuhosi  prosesu teste fíziku no teste SWAB (COVID-19). Bainhira teste ne’e fó rezultadu di’ak mak iha loron tuir mai ne’e nia sei aranka ba Singapura.

“Tuir planu, ha’u sei aranka ba Singapura ne’e iha loron 16 fulan janeiru tinan 2021. Ha’u husu ba timoroan sir abele erza ba ha’u para ha’u bele manan,” eroi Timor-Leste ne’ebé oras ne’e hela Jl. Sabrangkulon, Gang Sewu Mojosongo Jebres Surakarta, Solo, Jawa Tengah, Indonézia ne’e haktuir.

Notísia Relevante: Abro Fernandes: “Vitória Ne’e Ha’u Dedika Ba Ha’u-nia Inan-Aman”

Jornalista: Cancio Ximenes

Editór: Agapito dos Santos   

HAKEREK NO HATÁN

Please enter your comment!
Please enter your name here