DILI, 10 fevereiru 2020 (TATOLI)—Ba lutadór Mixed Martial Art (MMA) Abro Fernandes, Maromak ne’e la dook hanesan “rai” no “lalehan”. Maromak, nia dada besik hanesan “matan” no “ibun”. Antes atu fight (luta), nia “matan” haree no “ibun” mamar hodi temi Maromak Nia naran liuhusi orasaun.

Nu’udar sarani di’ak ne’ebé hahí no hanai relijiaun Katólika, antes atu tama ba “manu-futu fatin”, maske iha ema ua’in nia oin, ho nia liman-kuana, nia la moe habahat (ukir) tada “krúz” iha nia reen-toos ba, hodi halo “Hodi Padre, Hodi Filho, Hodi Espiritu Santu Sira-Nia Naran, Amen!”

Jestu ida ne’e, Abro Fernandes hatudu iha kompetisaun Internasionál Mixed Martial Art (MMA) One Championship ho títulu “ONE: WARRIORS CODE ne’ebé hala’o iha Istora Senayan, Jakarta, Indonézia, sesta (7/2/2020) kalan.

Iha kalan ne’ebá, antes atu tama ba “manu-futu fatin”, nia hakne’ak hodi hakru’uk no liman-kuana ne’e pinta hela tada “krúz” husi reen-toos tuun no para iha hirus-matan. Nia hakat tama ba laran, kada ronde, nia sempre habahat tada “krúz” ne’e hodi reza iha nia laran. Fiar ne’ebé nia iha, bele lori nia sai manan-na’in iha kompetisaun ne’e ho desizaun unanimidade husi juri sira.

“Vitória ne’e, ha’u dedika espesiál ba ha’u-nia inan-aman iha Luro, Lautem, Lospalos ne’ebá. Tanba sira mak hahoris no haboot ha’u. Ho sira-nia apoiu orasaun mak ohin loron ha’u bele manan no hetan susesu. Tanba ne’e, fight no vitória ne’e ha’u dedika espesiál ba sira na’in rua. Ha’u hadomi sira na’in rua,” dehan lutadór MMA Abro Fernandes ba Ajénsia TATOLI liuhusi rede sosiál, domingu (9/2/2020), no nia husu lisensa atu lori nia família sira ba igreja atu tuir misa.

Kmanek ne’e, mosu iha ne’e. Katak, ninia atividade tomak nia tau fiar iha Maromak. Ho Maromak, nia bele dada iis no bele hetan vitória. Ho Maromak nia domin, nia hadomi Mixed Martial Art (MMA) to’o lori nia sai famozu. Ho Maromak, nia hadomi nia família ho domin ida rohan laek. Ho domin tomak, nia sempre kesi domin no forsa ne’e iha Jezús Kristu. Tanba, nia ba ne’ebé de’it no halo saida de’it, nia sempre tara “krúz-fiksu” iha nia kakorok.

“Ha’u manan tanba ha’u kesi fiar iha Na’i Jezús Kristu. Ho Jezus nia forsa mak ha’u bele manan iha kompetisaun ne’e. Agradese ba Maromak no agradese ba Maun Jezús tanba ho nia forsa mak ha’u bele manan iha fight ne’e,” Abro Fernandes dehan.

Vitória ne’e, la’ós de’it nia dedika ba ninia inan-aman mesak, maibé ho onestu nia la nega nia feen-kaben no oan sira nia apoiu mak nia bele hetan vitória kmanek ida ne’e. Tanba, nia hatene katak susesu ne’ebé nia hetan la sees husi nia feen-kaben no oan sira-nia apoiu orasaun.

“Ha’u hatete ona antes ba ha’u-nia feen-kaben. Katak, ha’u manan karik, ha’u sei dedika vitória ne’e ba ha’u-nia inan-aman. La dook mós, segundu, ha’u dedika ba ó, ha’u-nia feen-kaben no ita na’in rua nia oan sira,” nia hateten.

Entretantu, Abro Fernandes ne’ebé fight lori bandeira Timor-Leste no bandeira Indonézia ne’e, haklaken ho onsetu katak hafoin kompetisaun ida ne’e, nia sei fila hikas mai iha Timor-Leste. Tuir planu, Abro Fernandes sei fila mai iha Timor-Leste iha sábadu (22/2/2020) semana oin.

“Iha loron 22 fevereiru, ha’u sei fila hikas ba Timor-Leste. Tanba, ha’u sei ba halo preparasaun hamutuk ho Komisaun Organizadora (KO) sira atu kria kompetisaun MMA nasionál iha loron 28-29 fevereiru 2020 iha Dili, Timor-Leste,” nia haktuir.

Notísia relevante:Abro Fernandes: “Ha’u Prontu Ona Atu Fight!”

Jornalista : Cancio Ximenes

Editór       : Rafy Belo

2 KOMENTÁRIU

  1. Parabens ba Abrao….Noticia tatoli la klaru, tamba iha noticia ne’e dehan deit Abrao hetan Vitoria maibe la klaru Abrao figth so se?

HAKEREK NO HATÁN

Please enter your comment!
Please enter your name here