DILI, 14 dezembru 2020 (TATOLI)—Luta Na’in Mixed Martial Arts (MMA) Lafaek Timor-Leste, Abro Fernandes, loloos tuir planu lori bandeira Timor-Leste atu semo ba Singapura iha 11 dezembru hodi “figth” kontra Luta Na’in MMA hosi Thailandia, Yodkaikaew “Y2K” Fairtex, iha One Championship Collision Course iha Singapura iha 18 desembru 2020, maibé tanba kestaun COVID-19 planu ne’e tenke kansela.
“Ha’u hakarak husu deskulpa ba ha’u-nia fans tomak no ema sira ne’ebé di’ak ona ba ha’u. Tanba ha’u hetan ona ona oráriu atu ‘figth’ iha 18 dezembru 2020 no loloos ne’e aranka ba Singapura iha 11 dezembru maibé tenke kansela. Prosesu teste fíziku no teste SWAB (COVID-19) nia rezultadu di’ak, maibé Maromak nia planu oin seluk. Tanba kestaun seluk, ha’u labele ba ‘figth’ iha Singapura. Espera ‘fight’ tuir mai ha’u sei bele hatan ita-boot sira-nia tuku-hirus ne’e,” Lutadór MMA Lafaek Timor-Leste, Abro Fernandes, haktuir ninia sentimentu ne’e hodi hakerek iha ninia varanda facebook, sesta (11 dezembru 2020).
Hafoin mehi ne’e kanseladu, obrigatoriumente Abro Fernandes tenke halo auto-kuarentena iha ninia rezidénsia iha Jl. Sabrangkulon, Gang Sewu Mojosongo Jebres Surakarta, Solo, Jawa Tengah, Indonézia. Maske teste SWAB ne’ebé nia halao iha 10 dezembru ne’e fó rezultadu negativu maibé tanba tenke tuir regra COVID-19 nian, nia tenke halo autokuarentena.
“Agora ne’e, ha’u halo hela auto-kuarentena iha uma. Tanba ha’u konatktu ona ema barak iha liur entaun ha’u tenke hakmatek iha uma. Ha’u tenke kumpre prosesu ida-ne’e durante loron 14 nia laran hodi labele moris kahor ho kolega sira seluk iha fatin treinamentu nian. Hafoin liu tiha loron 14 nia laran ne’e, mak ha’u hahú fali hala’o ha’u-nia treinamentu loro-loron nian hanesan baibain,” Abro Fernandes hateten ba Agência TATOLI liihosi Whatsapp (WA), segunda ne’e.
Ba ninia fans tomak iha Timor-Leste no iha ne’’ebé de’it, Abro Fernandes apela katak nia sei prepara aan ho didi’ak liuhosi treinu loro-loron. Atu nune’e, tuir nia, nia bele semo hikas ba Singapura iha ”figth” sira tuir mai ne’ebé komisaun organizadora sira sei realiza iha tinan oin iha fulan fevereiru 2021.
“Ba ha’u-nia fans tomak, ha’u husu labele arrepende (tuku hirus). Maromak iha planu seluk. Loron seluk, ha’u sei ba ‘figth’ iha Singapura iha tinan foun mai (2021) iha eventu One Championship ne’ebé hanesan. Maske halo auto-kuarentena iha uma maibé iha uma mós ha’u hala’o treinu nafatin ba nafatin,” Abro Fernandes apela.
Abro Fernades haktuir, tanba de’it nia konsega semo ba Singapura iha 11 dezembru 2020 no tuir ‘figth’ iha One Championship Coullision Course iha Singapura, entaun parte komisaun organizadora substitui ona nia ho luta na’in MMA hosi Japaun, Tatsumitsu Wada, hodi kontra hasoru luta na’in MMA hosi Thailandia, Yodkaikaew “Y2K” Fairtex, iha 18 dezembru 2020.
Jornalista: Cancio Ximenes
Editór: Agapito dos Santos