Pesoal Saude sira fo hela imunizasaun ba labarik sira iha Sentru Saude Comoro. Imajen/Antonio Gonzalves.

DILI, 07 janeiru 2021 (TATOLI)—Médiku Jerál Sentru Saúde Comoro, Melania do Rego, hateten moras dengue barak liu mosu iha tempu udan iha área Dom Aleixo Dili tanba ambiente fo’er no rai bokon hodi hakiak susuk Aedes aegypti atu moris no dezenvolve aan.

Iha tinan 2020, Sentru Saúde Comoro rejista pasiente dengue hamutuk 485, maioria afeta ba labarik ho tinan lima mai kraik.

Notísia Relevante :Saúde Munisípiu Ermera Rejista Moras Dengue Hamutuk 315

“Tinan  2020 iha área Dom Aleixo mate ba kazu dengue ema na’in lima  mesak idade labarik hotu tanba na’in lima ne’e relata husi Ospitál Nasionál Guido valadares,” nia dehan ba Tatoli, iha Comoro Dili, kinta ne’e.

Pasiente ne’ebé sofre moras dengue ne’e ho ninia sintoma maka hanesan isin manas maka’as derrepente, ulun moras maka’as, moras iha matan fukun, moras iha múskulu no artikulasaun (liman ain sikun), erupsaun iha kulit, bele mosu ran sai husi inus no seluk tan.

Atu prevene moras dengue liuhusi faze sira tuirmai; uza moskiteriu bainhira toba, hatais roupa naruk hodi taka isin lolon tomak, uza repelente susuk, prevene susuk nia moris fatin, hamaran bee nalihun regularmente, kontrola ho fogging ka rega ho mákina suar, hamoos lata no agua mamuk ne’ebé fasil atu susuk moris ba.

“Bele mós provoka kafuak mean iha isin lolon no bele ran sai husi inus entaun dengue ne’e  mosu bainhira iha  iha tempu udan,” nia dehan.

Nia haktuir pesoál saúde sira durante ne’e sempre halo promosaun hodi fahe informasaun ba komunidade no rega susuk para prevene mosu moras dengue.

“Promosaun ne’e ami halo bainhira ami la’o bá SISKA depois lorloron ami-nia karreta tama sai bairu hodi aviza nafatin ba komunidade atu prevene aan husi moras dengue mak hamoos uma ninin no toba uza moskuteiru laran,’’ nia informa.

Entretantu, iha tinan 2020 moras infeksaun vias respiratóriu ka ISPA mak domina Sentru Saúde Comoro ho totál pasiente 59.771, moras kulit hamutuk 14.594, diarea iha pasiente 10.248, hipertensaun 6.420, asidente tráfegu 3.892, pneumonia 1.945, STls iha 1.538, conjutivitis 2043, mánutrisaun 1.240,tubercoluse 240 no sarampu ema na’in 4.

Notísia Relevante :Dirijente Saúde Munisípiu Dili Konsidera Presiza Halo Sensibilizasaun Moras Dengue

Jornalista :Felicidade Ximenes

Editór :Agapito dos Santos.

HAKEREK NO HATÁN

Please enter your comment!
Please enter your name here