Evolusaun susuk aedes aegypti. Imajen/Espesiál

DILI, 09 maiu 2020 (TATOLI) – Diretora Saúde Munisípiu Dili, Agustina Sagorada, konsidera  presiza halo sensibilizasaun ba moras dengue hodi komunidade sira iha koñesementu kona-ba moras la hadaet ne’e tanba daudaun iha Munisípiu Dili rejista moras ne’e ho númeru a’as.

Iha Munisípiu Dili, moras dengue rejista ema na’in-670 no husi númeru ne’e iha ema na’in-neen maka mate husi idade tinan-lima mai kraik na’in-lima no husi tinan-lima ba leten na’in-ida.

“Sensibilizasaun ita labele ko’alia de’it ba COVID-19 maibé ita ko’alia ho moras la hadaet sira seluk, liu-liu dengue tanba bele hafanun ita-nia maluk sira atu iha hanoin prevene-an hasoru COVID-19 maibé sira mós hatene katak agora ita iha Dili rejista moras dengue ho númeru a’as tebes. Ida-ne’e maka ami integra tebes iha programa sensibilizasaun”, dehan Dirijente ne’e ba Agência Tatoli iha Merkadu Manleuana, foin lalais ne’e.

Tuir nia, iha estratejia lubuk ida maka tinan-tinan Saúde Munisípiu Dili hamutuk ho Ospitál Nasionál implementa atubele redús mortalidade ema ho moras dengue.

“Iha tinan ne’e kuandu halo komparasaun ho tinan kotuk ita hetan dadus a’as tebes. La’ós tanba estratejia balun ne’ebé ita tau la konsege realiza maibé tanba natureza tinan ne’e, liu-liu iha Dili iha kazu inundasaun dala-rua. Ida-ne’e maka mak sai fatór kontribuisaun hodi mosu susuk dengue”, nia akresenta.

Agustina Sagorada adianta, estratejia balun ne’ebé Saúde Munisípiu Dili halo iha fulan-setembru to’o dezembru 2020 maka fó avizu no mobiliza komunidade atu halo limpeza no prepara fasilidade saúde sira atubele atende sira ne’ebé ho sinál sintoma.

“Ita prepara hotu maibé tinan ida-ne’e ita konsentra ba buat rua mak ita tenke halo hotu. Tanba ne’e, parte ida maka ami sente importante iha planu estratejia ne’ebé maka atu redús númeru dengue maibé ita hasoru problema boot rua hanesan inundasaun no COVID-19”, nia salienta.

Nune’e, tanba hasoru problema rua dala ida maka Saúde Munisípiu Dili la konsege hato’o ba komunidade maibé iha esperansa katak komunidade hamutuk ho Autoridade Munisípiu Dili nafatin garante katak iha tinan ne’e maski ho problema barak mak afeta mós la’ós problema atu rezolve moras dengue.

“Ami nafatin kolabora ho parte hotu hanesan Organizasaun Mundiál Saúde hodi fó kapasitasaun ba ita-nia profisionál sira iha semana hirak liubá husi Hospital Nacional Guido Valadares (HNGV) no mós Saúde Munisípiu Dili atubele hadi’a liután estratejia tinan kotuk ba tinan ne’e”, nia akresenta.

HNGV haree ba jestaun kazu no hadi’a prevensaun atu prepara-an, enkuantu Saúde Munisípiu Dili haree ba oinsá hadi’a prevensaun.

“Liu-liu ita prepara molok udan monu, ema hotu tenke iha vontade di’ak atu koopera ho saúde hodi prepara di’ak ambiente, inklui iha kímiku balun atu suporta no distribui maibé presiza iha konsiénsia ida a’as hodi bele hlo prevensaun hodi hein kímiku ne’e ajuda ba fatin sira ne’ebé iha risku, espera katak ida ne’e mak sei halo iha tinan oin mai”, nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here