Ofisiál Sentru Saúde Gleno hala’o hela atendimentu ba pasiente sira. Imajen Tatoli/António Gonçalves

ERMERA, 11 jullu 2020 (TATOLI) – Xefe Sentru Saúde Gleno, Munisípiu Ermera, José de Carvalho, hateten Saúde Munisípiu Ermera rejista moras dengue hamutuk 315, enkuantu Sentru Saúde Gleno rasik rejista na’in-tolu.

“Moras ne’e a’as iha munisípiu Ermera, tuir mai mak Dili no maioria ba labarik. Iha Sentru Saúde Gleno rasik semana kotuk ami rejista na’in tolu, ami rega bebeik ai-moruk ba iha fatin risku sira maibé moras ne’e kontinua tanba moras ne’e mosu mai husi bee nalihun iha balde, tangki, no iha roda a’at sira ne’ebé bee nalihun,” relata Responsável Sentru Saúde Gleno ba Agência Tatoli iha nia ninia knaar fatin, sexta (10/07).

Tanba ne’e, nia kontinua apela ba komunidade atu hamoos uma ninin, fakar bee sira iha lata a’at sira nia-laran, iha vazu ai-funan nian no roda a’at sira.

Maski nune’e, daudaun ne’e ekipa saúde ambientál sira iha postu saúde ne’e rega nafatin ai-moruk susuk no stock ba aimoruk ne’e rasik sufisiente.

Aleinde ne’e, moras ne’ebé sei rejista a’as iha Sentru Saúde Gleno mak infesaun respiratóriu ka ispa.

“Sentru saúde ne’e rejista moras a’as liu mak infesaun respiratóriu, hafoin pneumonia tanba infesaun respiratóriu ne’e prova ona pneumonia, tuir mak moras kulit, no mós moras la hada’et hanesan diabetes, tensaun a’as, asma, no fuan,” tenik José de Carvalho.

Responsável ne’e dehan, infesaun respiratóriu ne’e a’as tanba agora tempu anin-boot, rai-rahun barak no la fase liman bainhira han.

“Ispa ne’e maioria mosu ba labarik sira, tanba inan-aman la kuidadu hainhira oan sira atu han, tanba la fase liman no kaer de’it hahán, piór liu mak sigaru nia suar tanba dala-ruma fuma besik labarik sira maka sigaru suar kona ne’e hamosu mear, tanba ne’e maka kuandu fuma labele besik labarik sira,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here