Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/Egas Cristovão

DILI, 05 janeiru 2021 (TATOLI)—Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hateten presiza halo avaliasaun regulár no permanente ba implementasaun programa Cesta Bázika nune’e labele mosu faillansu.

Notísia Relevante: PN husu empreza sira fahe hahan saudável ba Povu

Governante ne’e rekoñese iha implementasaun programa Cesta Bázika ne’e mosu problema balun ne’ebé mak relasiona ho deputadu sira foti.

Maibé nia fundamenta, problema sira-ne’e Governu halo kedas medida hodi fó kedas atensaun ba emprezáriu sira tanba hahan ne’ebé fahe tenke di’ak.

“Ha’u-nia hanoin ida-ne’e presiza halo avaliasaun regulár no permanente ba implementasaun programa ne’e,” governante ne’e ko’alia kestaun ne’e iha loron tersa ne’e, iha plenária Parlamentu Nasionál hodi responde preokupasaun deputadu sira kona-ba kualidade hahan ne’ebé integra iha Cesta Bázika ne’e.

Nia argumenta, implementasaun Cesta Bázika ne’e la’ós Governu mak fahe maibé kompñia sira mak fahe maibé Governu akompaña hamutuk ho Komisaun Antí Korrupsaun (CAC-sigla portugés), PDHJ no NGO sira.

“Fó sira-nia opiniaun katak iha buat ruma failla, ne’e klaru Governu rekoñese no Governu hadi’a kedas la’os husik de’it maibé hadi’a nafatin atu nune’e bele hetan solusaun di’ak ba populasaun hotu,” nia dehan. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here