Produtu Cesta Bázika. Imajen TATOLI/Antónia Gusmão

DILI, 15 dezembru 2020 (TATOLI)—Tuir dadus provizóriu hosi Sekretaria Estadu Kooperativa (SEKoop) distribui ona produtu Cesta Bázika ba benefisiáriu hamutuk 102.828 no sei hela balun maka iha prosesu distribuisaun.

“To’o meiu dia ne’e, bazeia ba relatóriu ne’ebé ha’u simu, hamutuk benefisiáriu 102.828 maka simu ona produtu Cesta Bázika. Signifika sei hela 300.000 resin maka seidauk benefisia maibé ami sei kontinua serbisu simultaneamente iha munisípiu sira,” Sekretáriu Estadu Elizário Ferreira informa iha ninia knaar fatin, edifísiu Akait, tersa ohin.

Ministériu implementadór iha programa Cesta Bázika maka hanesan Gabinete Ministériu Koordenadór no Asuntu Ekonómiku (MKAE), Ministériu Turizmu, Komérsiu no Indústria (MTKI), SEKoop, Sekretaria Estadu Ambiente (SEA) inklui Autoridade Rejiaun Administrativa Espesiál Oé-cusse Ambeno (RAEOA).

SEKoop responsabiliza distribuisaun produtu iha munisípiu hitu hanesan Suai, Ainaro, Same, Aileu, Manatuto, Liquiçá, Lautém.

Minisípiu hitu kompostu hosi postu administrativu 33, suku 181, aldeia 912, ho totál populasaun hamutuk 432.529.

Governante ne’e dehan, ekipa distribuisaun sira akompaña hela prosesu distribuisaun ba komunidade sira iha kada suku no sei kontinua nafatin.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Governu implementa medida haat ho kustu totál millaun $113,4, ba kurtu prazu hanaran mitigasaun impaktu ekonómiku no sosiál ba krize COVID-19, ho objetivu esensiál atu haree ba postu traballu ezistente antes krize no rekupera rendimentu família liuhosi hadi’a empregu no apoiu direitu sidadaun no empreza iha merkadu inklui normaliza hikas atividade ekonómika.

Hosi medida haat ne’e, inklui hotu programa Cesta Bázika ba família, ho totál kustu ba implementasaun hamutuk millaun $71,5 (valór bele iha mudansa) ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here