Imajen/Media PR.

DILI, 31 dezembru 2020 (TATOLI)–Prezidente Repúblika (PR), Francisco Guterres Lú Olo, konvida povu Timor-Leste (TL) tomak atu organiza-aan iha ida-idak nia fatin hodi husik hela minutu balun iha loron ohin, atu presta omenajen ba eroina no eroi sira.

Notísia Relevante: Saudozu Prezidente Nicolau Lobato nu’udár líder vizionáriu

PR Lú Olo fó sai konvite ne’e liuhosi mensajen komemorasaun loron eroina no eroi nasionál sira nian no simu tinan foun, iha Palásiu Prezidensiál Nicolau Lobato, Bairru-Pité, Dili.

“Ita loron espesiál ida-ne’e, ha’u husu ba maluk hotu-hotu atu hasa’e neon ba ita-nia erói nasionál, saudozu Prezidente Nicolau dos Reis Lobato no mós ba eróina no erói hotu-hotu sira ne’ebé fó-aan tomak to’o mate ba rai doben ida-ne’e. Ida-idak iha nia hela fatin rasik, organiza-aan ba, hodi nonook minutu ida hodi fó omenájen, ohin, ba ita-nia eroína no eroi sira,” PR Lú Olo konvida povu Timor-Leste tomak, kinta ne’e.

Xefe Estadu ne’e hateten, bainhira timoroan hanoin hikas no presta omenájen ba eróina no erói sira ne’ebé mate ba Pátria ida ne’e, ne’e hatudu katak timoroan rekoñese sira-nia kompromisu ba rai ida-ne’e no valór sira-ne’ebé sira kaer metin to’o hetan Ukun Rasik-Aan, hanesan fiar ba malu, brani no matenek foti desizaun, simu malu, tulun malu no reziliénsia.

“Ita-nia Pátria Timor-Leste moris hosi sira-nia sakrifísiu. Sira oferese sira-nia vida ba ita-nia liberdade no independénsia,” Veteranu ne’e rekoñese.

PR Lú Olo hatutan, ohin loron, timoroan hotu la husu ba malu atu sakrifika vida ba País livre no independente. Maibé, nia dehan, hanesan timoroan tenke eziji ba malu buat ida importante tebes mak  atu labele see kotuk ba malu maibé haree ba malu nu’udár família boot ida.

Prezidente Repúblika husu ba ida-idak atu dedika-aan liután ba knaar ne’ebé ida-idak halo iha Funsaun Públika ka iha sektór privadu, iha toos ka natar ka iha tasi ka iha lala’ok ne’ebé de’it. Ida-idak, iha nia servisu-fatin, atu presta servisu ho kualidade aas hodi haburas ekonomia iha aspetu hotu-hotu no hasa’e moris- di’ak ba Povu tomak.

“Hanesan ne’e de’it mak ita valoriza sakrifísiu hotu-hotu ne’ebé saudozu assua’in sira halo ba ita hotu,” aman nasaun ne’e sublña.

Notisia Relevante: Loron Eroi Nasionál: Nicolau Lobato Mak Povu Nia Lider

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here