Estátua Saudozu Nicolau dos Reis Lobato. Imajen espesiál

DILI, 31 dezembru 2020 (TATOLI)–Prezidente Repúblika (PR), Francisco Guterres Lú Olo, konsidera eis Prezidente Repúblika Timor-Leste nian, saudozu Nicolau Lobato nu’udár líder vizionáriu ne’ebé dezde hahú kedan dezeña konseitu ba luta libertasaun pátria, fiar metin katak rai ne’e sei ukun-an duni iha tempu ida.

“Ohin, ha’u hakarak fó-hanoin ba maluk sira, saudozu Nicolau Lobato ninia liafuan murak balun, nu’udár líder ho vizaun kle’an no dook, ho kedas fiar metin katak ita sei manán ita-nia Ukun Rasik-Aan loron ida,” PR Lú Olo ko’alia lia hirak ne’e liu hosi mensajen  komemorasaun loron Eróina no Erói nasionál sira nian no simu tinan foun, iha palásiu Prezidente Bairru-Pité, Dili, kinta ne’e.

Xefe Estadu ne’e haktuir, liuhosi mensajen fó-sai iha rádiu, iha 20 maiu 1978, loron aniversáriu dahaat FRETILIN nian, saudozu Prezidente Nicolau Lobato tatoli ho lian portugés ba Povu tomak: “Os nossos inimigos são muitos e poderosos. Nós somos um país pequeno e fraco. Entretanto, sabemos, e podemos, e devemos vencer”.

“Ha’u nakfila ba lian tetun: Ita iha inimigu barak no sira iha kbiit makaas tebes. Ita-nia país kiik no fraku. Maibé, ita hatene, ita bele no ita tenke manán! Iha loron ne’e duni, saudozu líder hateten ho fiar tomak: Tanba ita luta ho laran metin atu manán, ita hakat daudaun ona ba vitória. Tanba ne’e ita hatete: A vitória é certa! Vitória ida-ne’ebé saudozu Prezidente Nicolau Lobato fiar sei akontese no fó-sai iha 1978 fulan hitu molok nia mate, akontese duni iha tinan 1999, bainhira maioria Povu, ho barani no determinasaun, hili Ukun Rasik-Aan no ita, ohin loron, moris ho liberdade no dignidade, nu’udár Povu,” PR Lú Olo hateten.

Entertantu, Estadu Timor-Leste hatuur loron 31 dezembru, nu’udár Loron Eroína no Erói sira-nian, liuhosi Lei no 3/2016, 25 maiu.

Tuir Lei ida-ne’e, PR Lú Olo hatutan, Estadu hili loron ne’e atu timoroan hotu-hotu fó omenájen ba Nicolau dos Reis Lobato, nu’udár líder rezisténsia no Prezidente FRETILIN. Maibé, molok lakon nia vida iha kombate, saudozu Nicolau kaer mós knaar nu’udár Comandante-em-Chefe das FALINTIL no Prezidente Repúblika Demokrátika Timor-Leste.

Xefe Estadu ne’e hatutan, iha maiu 1975, bainhira liuhosi Lisboa, Portugál, atu ba asiste serimónia proklamasaun independénsia Moçambique nian, Prezidente Nicolau Lobato hatete ba belun timoroan ida: “Ha’u sei mate ho kilat iha liman”. Hafoin kaer kilat liu tinan tolu, Prezidente Nicolau Lobato mate duni ho nia kilat, iha 31 dezembru 1978, iha kombate hasoru forsa indonézia, iha vale Mindelo, Postu Admnistrativu Turiscai, Manufahi.

PR Lú Olo konsidera Sakrifísiu dahuluk liu ne’ebé saudozu Nicolau Lobato halo mak hosik ninia empregu di’ak iha administrasaun koloniál, iha tinan 1974. Hosik empregu hodi dedika-aan tomak ba prosesu kuda no haburas sentidu Povu no Pátria ba timoroan hotu, iha territóriu laran tomak. Ninia sentidu responsabilidade ba Povu no Pátria ida ne’e halo nia sakrifika-aan no sakrifika mós ninia família nia moris-di’ak.

“La’ós fásil iha tempu ne’ebá atu konvense ita-nia ema atu hamriik hamutuk no ezije Ukun Rasik-Aan. Ita-nia bei’ala sira reziste iha fatin-fatin maibé la haburas sentimentu no hahalok hanesan ba reinu hotuhotu: hasees kolonializmu, habelar konxiénsia no unidade nasionál no kaer rasik ukun aan, nu’udár Povu ida de’it. Nicolau Lobato no mós líder FRETILIN sira seluk, iha tempu ne’ebá, ho pasiénsia no determinasaun, neineik no ba beibeik, konsege konvense Povu ain-tanan, maioria agrikultór no analfabetu, atu fiar-an, katak ida-idak iha matenek no kbiit rasik no, hamutuk, bele harii Nasaun foun ida, no moris nu’udar Povu, hanesan Povu sira seluk,” nia dehan tan.

Prezidente Repúblika fó hanoin mós katak, bainhira forsa indonézia tama teritóriu Timor-Leste, mehi atu Ukun Rasik-Aan buras no metin tiha ona. Líder sira, kombatente no Povu ain-tanan prontu ona atu sakrifika-an ba mehi ida ne’e.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here