Imajen artista Timor-oan sira, inklui Diva POP Indonézia nian, Krisdayanti ho nia oan, Amora Lemos, ne’ebé atu anima iha festivál gala dinner for spirit 2021 ne’ebé Raya Event atu realiza iha kalan 31 dezembru 2020, maibé tenke adia tanba kumpre ba regra Estadu Emerjénsia. Imajen/Raya Event

DILI, 30 dezembru 2020 (TATOLI) – Festivál gala dinner for spirit 2021 ne’ebé Raya Event atu realiza  iha kalan 31 dezembru 2020, iha Salaun OCA, Osindo, Dili,  tenke adia ba tempu seluk  tanba Estadu Timor-Leste  deklara ona estensaun Estadu Emerjénsia ba-dasiak.

Notísia Relevante : Raya Event klarifika billete festivál Gala Dinner for Spirit of 2021

Iha regra prinsipál balun iha EE ba-dasiak, maka ema la bele halibur malu liu na’in-10  (distánsia sosiál), la bele halo festa no la bele halo lia. Ho nune’e, komisaun organizadora Raya Event ba festivál gala dinner for spirit 2021 deside hodi adia festivál ne’ebé au mézmu tempu atu  halo lansamentu ba Raya Event.

Yongky Kawegian, reprezenta komisaun organizadora hosi Raya Event husu deskulpa ho inkonveniénsia tanba situasaun Estadu Emerjénsia. Mezmu nune’e,  Yongky afirma tan, eventu ne’e la’ós atu kansela totál, maibé adia de’it hodi hein loron ne’ebé oportunu.

“Ami  sei nafatin atualiza informasaun sobre kestaun hirak ne’e no nafatin informa ba ita-boot sira hotu karik iha mudansa ruma,” Yongky Kawegian, informasaun ba Agência Tatoli, ohin, iha edifísiu Raya Event, Dili.

Komisaun organizadora mós triste hodi pronunsia adiamentu ba eventu istóriku ba Raya Event ne’e, maibé ida ne’e mak desizaun no presiza ema hotu iha nasaun ne’e atu kolabora no kontribui hodi evita propagasaun peste letál Coronavirus ka COVID-19.

Notísia Relevante : Krisdayanti, Marvi, Amora Lemos sei anima populasaun iha tinan foun

Jornalista   : Tomé Amado

Editór        : Agapito dos Santos

HAKEREK NO HATÁN

Please enter your comment!
Please enter your name here