Ekipa Servisu Investigasaun Kriminál Nasionál (SIKN-PNTL) taka data center kompañia Globalnet Unipesoal Lda iha Timor Plaza Dili. Imajen Tatoli/Eugénio Pereira

DILI, 21 dezembru 2020 (TATOLI) – Ekipa Servisu Investigasaun Kriminál Nasionál (SIKN-PNTL), ohin, tuku 16:00 Otl, detein tan suspeitu Timor-oan ida ho inisiál AM hosi Kompañia Globalnet Unipesoál Lda ne’ebé deskunfia envolve iha kazu ligasaun internet ilegál.

Notísia Relevante : Internet ilegál, SIKN detein tan suspeitu na’in-haat

SIKN ne’ebé lidera hosi Komandante SIKN, Superintendente Xefe, José Neto Moc ho ekipa inklui traballadór Globatnet kontinua halo vizita ba haree direita ekipamentu VSAT boot rua ne’ebé monta iha área Pantai Kelapa hodi tau fita police line. Imajen Tatoli/Eugénio Pereira

Iha prosesu investigasaun, parte SIKN deskonfia suspeitu AM nu’udar autór importante ne’ebé hatene informasaun barak kona-ba prosesu ligasaun internet ilegál, mezmu kompañia Globalnet hatama ona pedidu ba Autoridade Nasionál Komunikasaun (ANC) atu hetan lisensa sertifikadu fornese internet supply provider, maibé to’o agora ANC la aprova.

Ekipa SIKN hodi IT Globalnet mós halo kedas vizita ba taka data center kompañia Globalnet ne’ebé sentraliza iha andár tolu, Timor Plaza-Dili.

Durante halo identifikasaun ba data center Globalnet ne’ebé durante ne’e fornese rede internet ba instituisaun Governu no halo identifikasaun ba ninia sistema kontrolu fornese rede internet uza satélite Eurostar internasionál nian ne’ebé la rejista ninia identidade iha Timor-Leste no la iha internasionál.

Deskunfia, kompañia ne’e  fornese rede internet ilegál ba instituisaun Estadu no parte kompañia privadu sira ho kapasidade boot utiliza sistema kontrolu direita internet iha Singapura.

Hafoin halo tiha investigasaun hodi rekolla dadus balun iha data center, ekipa SIKN ne’ebé lidera hosi Komandante SIKN, Superintendente Xefe, José Neto Moc ho ekipa inklui traballadór Globatnet kontinua halo vizita ba haree direita ekipamentu VSAT boot rua ne’ebé monta iha área Pantai Kelapa hodi tau fita police line, no vizita mós data center inklui ekipamentu VSAT rua ne’ebé monta iha área jardín Otél Exelsior Resort nian, no área Mandarin nian.

Tuir informasaun ne’ebé Agência Tatoli asesu katak, kompañia Globatnet no R2M IT Solution durante ne’e halo esforsu hodi halo rejistu iha Autoridade Nasionál Komunikasaun (ANC), maibé parte ANC seidauk bele rekoñese sira nia prezensa hodi fó de’it sertifikadu ba kompañia Timor Telecom, Telkomcel no Telemor.

Iha dadus  ne’ebé Tatoli asesu hosi ANC, kompañia ualu (8) ne’ebé halo atividade hatama pedidu lisensa koñesimentu ba Governu Timor-Leste liuhosi ANC hanesan, Kompañia Ace Consultancy, Lda, Cenime Network Satcom Timor, Lda, Gardamor ISP, Lda, Globalnet Unipesoal Lda, Metrolink Lda, Raph Vision Electronic Unipessoal Lda, Websatmedia Unipesoal Lda no W-Net Unipespal Lda, maibé kompañia hirak ne’e too agora seidauk hetan hetan lisensa internet supply provider.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here