Ekipa SIKN detein suspeitu tékniku IT deskonfia envolve iha kazu ligasaun internet ilegál iha Timor-Leste. Imajen Tatoli/Eugénio Pereira

DILI, 21 dezembru 2020 (TATOLI)- Komandu Polísia Nasionál Timor-Leste liuhosi Servisu Investigasaun Kriminál Nasionál (SIKN), ohin, detein tan  suspeitu tékniku IT (information technology) na’in-haat (4) ne’ebé deskonfia envolve iha kazu ligasaun internet ilegál iha Timor-Leste.

Notísia Relevante : Kazu internet ilegál, PNTL sei identifika tan suspeitu balun

Suspeitu na’in-haat ne’e hosi kompañia nasionál, R2M IT Solution ho inisiál hanesan MG, JXS, KEC no NPS . SIKN aplika detensaun fragante delitu iha sira-nia servisu fatin, R2M IT Solution, Hudi-Laran, Dili.

SIKN mós lori traballadór na’in-haat hosi Kompañia Global Net hanesan JFGX, HIW, HBT no AM hodi halo prosesu identifikasaun kona-ba sira-nia servisu ligadu ho internet.

SIKN halo mós investigasaun ba data center kompañia R2M IT Solution hodi halo apreensaun ba material sira hanesan Teleport ida, Teleport simu liña internet ida, laptop rua inklui makin imprime balun ne’ebé ligadu ho prosesu fornese internet nian durante ne’e.

Hafoin halo tiha investigasaun, parte SIKN dada kedas fita police line hodi taka metin fatin sentru data hodi asegura to’o prosesu investigasaun remata.

Ekipamentu sira ne’ebé SIKN sobu, durante ne’e kompañia R2M utiliza hodi halo koneksaun liña internet ilegál hosi satellite Kapasific Singapura hodi fornese mai Timor-Leste, no kompañia ne’e mós la rejistu ninia legalidade iha internasionál.

Iha  kompañia Global nian, SIKN deteta sira uza satélite Eurostar internasionál nian ne’ebé la rejista ninia identidade iha Timor-Leste no la rejistu mós iha internasionál.

Durante halo investigasaun, SIKN deteta mós kompañia R2M durante ne’e la rejistu ninia identidade iha Autoridade Nasionál Komunikasaun (ANC) hodi hetan lisensa internet supply provider.

Hafoin SIKN halo operasaun no identifikasaun iha kompañia R2M ho Global Net, parte suspeitu sira koopera hodi hatudu fatin sentru data kona-ba sistema fornesimentu internet ilegál hodi sobu mós ekipamentu balun.

Iha servisu fatin Global Net nian, SIKN rekolla mós dadus no apreensaun ba ekipamentu no dadus fornesimentu internet nian  halo identifikasaun ba liña internet no sobu ekipamentu balun iha área Pantai Kelapa no Mandari nian.

Daudaun ne’e suspeitu sira kumpre prosesu investigasaun no sei detein iha sela Polísia durante oras 72, molok aprezenta submete ba primeiru interrogatóriu iha Tribunál Distritál Dili.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here