Vise-Prezidente Parlamentu Nasionál, Deputadu Luis Roberto. Imajen TATOLI/Doc.

DILI, 16 dezembru 2020 (TATOLI)—Parlamentu Nasionál (PN) haruka ona proposta no 23/V (3a) kona-ba Orsamentu Jerál Estadu (OJE) tinan fiskál 2021 ba Prezidente Repúblika hodi halo promulgasaun.

Notísia Relevante: PN aprova proposta OJE 2021 iha finál globál

“Proposta-lei ne’e Parlamentu Nasionál haruka tiha ona ba Prezidente Repúblika iha loron segunda liubá,” Vise-Prezidente Parlamentu Nasionál, Deputadu Luis Roberto, informa ba jornalista sira, iha Parlamentu Nasioná, kuarta ne’e.

Deputadu Luis Roberto da Silva dehan, Xefe Estadu promulga lalais di’ak liután nune’e tama iha fulan-janeiru 2021 bele tama ona iha ezekusaun orsamentál.

Deputadu bankada Kmanek Haburas Unidade Nacional Timor Oan (KHUNTO) ne’e esplika, bazeia ba lei Xefe Estadu sei estuda durante loron 30 hodi hola desizaun ba proposta-lei ne’e.

Parlamentu Nasionál (PN), aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1.895 iha finál  globál iha loron sábadu (12 dezembru 2020), semana kotuk.

Proposta-lei no 23/V (3a)-Orsamentu Jerál Estadu ba tinan fiskál 2021 aprova ho rezultadu votasaun a-favór 44, kontra 0 no abstensaun 0.

Proposta-lei OJE ba tinan fiskál 2021 hamutuk biliaun $1.895 kompostu hosi saláriu no vensimentu millaun $ 239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Notísia Relevante: Komisaun C konklui ona redasaun finál OJE 2021

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here