Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 14 dezembru 2020 (TATOLI)—Komisaun C (Finansa Públika), ohin, konklui ona redasaun finál ba proposta-lei Orsamentu Jerál Estadu (OJE) ba tinan fiskál 2021.

Notisia Relevante: PN aprova proposta OJE 2021 iha finál globál

“Ami konklui ona redasaun finál ba proposta-lei orsamentu 2021 ho rezultadu votasaun a-favór 8, kontra 0 no abstensaun 0. Komisaun C sei haruka ba Prezidente Parlamentu Nasionál hafoin enkamiña ba Prezidente Repúblika,” Prezidente Komisaun C, Deputada Maria Angélica Rangel, informa ba jornalista sira iha Parlamentu Nasionál.

Deputada Maria Angélica Rangel esplika, atu haruka proposta-lei ne’e ba Prezidente Repúblika ne’e kompeténsia Prezidente Parlamentu Nasionál nian.

Parlamentu Nasionál (PN), sábadu (12 dezembru 2020) aprova ona proposta-lei Orsamentu Jerál Estadu (OJE) ba tinan fiskál 2021 ho montante biliaun $1.895 iha finál globál.

Proposta-lei no 23/V (3a)-Orsamentu Jerál Estadu ba tinan fiskál 2021 aprova ho rezultadu votasaun a-favór44, kontra 0 no abstensaun 0.

Proposta-lei OJE ba tinan fiskál 2021 hamutuk biliaun $1.895 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here