Prezidente CNRT Xanana iha militante nia klaran

DILI, 05 dezembru 2020 (TATOLI)—Bankada Congresso Nacional da Reconstrução de Timorense (CNRT), deside la partisipa debate faze espesialidade kona-ba proposta-lei Orsamentu Jerál Estadu (OJE) tanba ezekusaun orsamentál kiik no mosu errata barak iha dokumentasaun orsamentál sira.

Bankada parlamentár CNRT, haktuir pontu importante sira-ne’ebé Bankada CNRT foti durante períodu audiénsia membru VIII Governu ho Komisaun Permanente no mós debate iha sesaun jeneralidade ba proposta-lei OJE 2021 iha Parlamentu Nasionál nian mak hanesan Governu nia kapasidade ezekusaun kiik, atu raemata tinan fiskál 2020 ho ezekusaun foin atinje 60% hosi totál orsamentu biliaun $1,5.

Pontu ida-ne’ebé bankada CNRT nota iha relatóriu no paresér Komisaun A ne’ebé trata asuntu Justisa no Konstitusionál deskobre “inkonstitusionalidade” ba proposta-lei OJE 2021.

Nune’e mós membru bankada CNRT ne’ebé envolve iha komisaun espesializada permanente deskobre errata barak iha elaborasaun no estrutura OJE 2021 no viola Lei Orsamentu Jestaun Finanseira (LOF-sigla portués).

“Ho faktu sira-ne’e maka Bankada CNRT deside atu la-partisipa iha diskusaun Orsamentu Jerál Estadu 2021. Bankada CNRT haree katak estrutura OJE 2021 ne’e repetisaun hosi OJE 2020 ne’ebé Bankada CNRT vota abstensaun,” Deputada Maria Fernanda Lay, Carmelita Caetano Moniz no Maria Rosa da Câmara Bi-soi, informa liuhosi komunikadu imprensa ne’ebé Ajénsia TATOLI, asesu, sesta ne’e.

Deputada Maria Fernanda Lay hola-parte iha Komisaun C (Finansa Públika), deputada Carmelita Caetano Moniz destaka iha Komisaun A (Justisa no Konstitusionál) no Maria Rosa da Câmara Bi-soi durante ne’e kolokada iha Komisaun B (Negósiu Estranjeiru, Defeza no Seguransa).

Bankada CNRT konsidera Governu laiha kapasidade halo orsamentu tanba iha errata barak iha proposta lei orsamentu jerál estadu 2021.

“Errata sira-ne’e hatudu katak Governu nia ambisaun atu muda orsamentu por orgánika ba orsamentu por programa ne’e la-kondíz ho kapasidade Governu nian atu halo orsamentu,” nia dehan.

Bankada CNRT konsidera Orsamentu Jerál Estadu 2021 ho errata ne’ebé barak la-merese atu debate iha Parlamentu Nasionál.

Tanba ne’e Bankada CNRT lakohi atu Governu pasa fali responsabilidade halo orsamentu ba iha deputadu sira iha Parlamentu Nasionál.

Purtantu iha debate jeneralidade loron ikus, Vise-Xefe Bankada CNRT, Deputadu Patrocínio Fernandes dos Reis, fó-sai liuhosi plenária, katak sei la envole tomada desizaun proposta OJE 2021.

“Ami iha mekanzsmu rasik atu mantein silénsiu hodi la foti desizaun ba kualkér aprovasaun OJE ida-ne’e,” Vise-xefe Bankada CNRT ne’e hateten.

Ho desizaun bankada CNRT nian, Prezidente Parlamentu Nasionál, Deputadu Aniceto Lonuinhos Guterres Lopes  halo interpretasaun katak,se kualkér tomada desizaun ne’e inklui mós desizaun kona-ba liña orsamentál tuir proposta ne’ebé iha.

Ho pronunsiamentu hosi Prezidente Parlamentu Nasionál, bankada CNRT Deputada Maria Fernanda Lay deklara retira proposta alterasaun hamutuk hosi debate espesialidade loron dahuluk.

“Ami-nia desizaun walk out, ha’u retira proposta ne’ebé ha’u sai proponente no proposta hotu-hotu (todas as propostas),” deputada bankada CNRT esklarese liuhosi plenária.

Hafoin deside retira proposta altersaun ne’e, bankada CNRT sai hosi plenária hodi hala’o de’it servisu iha bankada nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here