Ministru Asuntu Parlamentár no Komunikasaun Sosiál, Francisco Jerónimo no Vise-Ministra Finansa, Sara Lobo Brites, entrega Proposta Lei OJE 2021 ba Prezidente Parlamentu Nasionál, Aniceto Guterres, iha PN, kinta (15 outubru 2020). Imajen Tatoli/António Gonçalves

DILI, 15 outubru 2020 (TATOLI)—Governu liuhosi Ministériu Finansa (MF), kinta ne’e, aprezenta ona Proposta Lei Orsamentu Jerál Estadu (OJE) 2021 ho montante biliaun $1.895 ba Parlamentu Nasionál (PN).

Proposta OJE 2021 hamutuk biliaun $1.895 kompostu hosi saláriu no vensimentu millaun $ 239,26, bens (sasán) no servisu millaun $421,49, transferénsia públika millaun $669,91, kapitál menór millaun $61,14 no kapitál dezenvolvimentu millaun $503,20.

Dokumentasaun orsamentál sira-ne’ebé Governu aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Iha aprezentasaun Proposta Lei OJE 2021 ne’e aprezenta hosi Ministra Finansa Ein-ezersísiu atuál Vise-Ministra Finansa, Sara Lobo Brites no akompaña hosi Ministru Asuntu Parlamentár no Komunikasaun Sosiál, Francisco Jerónimo.

Iha biban ne’e, Prezidente Parlamentu Nasionál, Deputadu Aniceto Longuinhos Guterres Lopes, apresia governu nia esforsu tanba aprezentasaun Proposta Lei Orsamentu tuir lei haruka.

“Iha oras 15.00, loron 15 outubru ne’e Governu kumpre duni prazu aprezentasaun Proposta Lei Orsamentu Jerál Estadu. Prosesu tuirmai kabe ba kompeténsia Parlamentu nian atu hala’o prosesu orsamentál iha Parlamentu Nasionál,” Aniceto Guterres informa liuhosi Konferénsia Imprensa hafoin simu proposta- ei ne’e, iha Parlamentu Nasionál.

Deputadu Aniceto Guterres fó-sai katak meza prezidénsia sei halo leitura ba númeru proposta lei ne’e no asesór legál-sira sei prepara nota téknika hafoin baixa ba Komisaun C (Finansa Públika) no Komisaun Espesializada Permanente sira seluk atu aprova relatóriu no paresér.

“Posivelmente segunda semana oin, lae tersa, atu baixa ba Komisaun C. Aban (16/10), sei fó tempu ba tékniku-sira atu prepara nota téknika,” nia katak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here