Adjuntu Komisáriu CAC, Luis de Oliveira Sampaio, lidera ekipa Espesialista Anti-Korrupsaun (EAK) hala’o intervensaun imediatu hodi prende batar “fuhuk”, koto “fuhuk”, modo dodok no hapara obrigatóriamente fahe ai-han iha programa Cesta Bázika iha Loza Dili Mart, Raikotu, Comoro, Dili, kuarta (09/12). Imajen/CAC

DILI, 10 dezembru 2020 (TATOLI)-Komisaun Anti-Korrupsaun (CAC) liu hosi ekipa Espesialista Anti-Korrupsaun (EAK) kontinua halo investigasaun ba jerente kompañia  Dili Mart kona-ba  distribui sasán ‘’fuhuk’’ iha programa Cesta Bázika, iha Suku Comoro, Dili, kuarta (09/12).

Notísia Relevante : CAC ba bolu obrigatóriu jerente Dili Mart iha Raikotu

“Prosesu ne’e agora iha inkéritu hela buka atu konsolida informasaun-sira ne’ebé ita hetan ne’e resposta ba preokupasaun no lamentasaun públiku nian durante ne’e,’’ Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, hateten  ba jornalista, ohin, iha edifísiu CAC, Faról, Dili,

Nia esplika, prazu identifikasaun durante oras 12  hodi presta deklarasaun ne’ebé iha mós evidénsia-sira hanesan sasán ‘’fuhuk”  no  ba notifikasaun CAC nian hodi haree se iha indísiu  sei halo auto notísia ba Ministériu Públiku (MP) nu’udar na’in ba asaun penál hodi halo  mandadu detensaun no submete ba primeiru interrogatóriu iha Tribunál primeira instánsia.

Espesialista Anti-Korrupsaun (EAK), ohin, tuku 09:25 Otl,  tun direta ba ramu loza Dili Mart nian ida iha Raikotu, Comoro, Dili, hodi bolu obrigatóriu jerente Dili Mart. Nune’e,  iha tuku 10:30 Otl,  ekipa EAK kontinua mós tun  ba iha loza Dili Mart nian iha Bidau, Dili, hodi bolu mós jerente ida seluk hamutuk na’in-rua hodi submete ba identifikasaun.

CAC mós sei halo notifikasaun ba Koordenadór Ministériu Turizmu Komérsiu no Indústria (MTCI)  ne’ebé  halo akompañamentu iha distribuisaun Cesta Bázika iha Suku Comoro, Postu Administrativu Don Aleixo, Munisípiu Dili.

Jornalista   : Nelson de Sousa

Editór        : Francisco Simões

 

HAKEREK NO HATÁN

Please enter your comment!
Please enter your name here