Ilustrasaun

DILI,10 dezembru 2020 (TATOLI)—Diretora Servisu Saúde Munisípiu Dili, Agostinha Segurado, hateten komunidade sira fasil atu hetan moras dengue iha tempu udan bainhira ambiente fo’er no la seguru hodi fó biban ba susuk Aedes aegypti no Aedes albocpictus atu moris ba.

Aleinde ne’e, moras diarea, isin katar no ISPA mós sei ameasa ba populasaun nia-moris iha tempu udan.

Notísia Relevante :Saúde Munisípiu Ermera Rejista Moras Dengue Hamutuk 315

Tanba ne’e, nia apela ba ema hotu-hotu iha Dili atu hamoos uma-hun, toos laran, uma ninin hodi evita mosu moras hirak ne’e.

Nia dehan Servisu Saúde Munisípiu Dili liuhosi profisionál saúde ne’ebé oras ne’e servisu iha postu saúde, sentru saúde no ospitál sei halo promosaun saúde hodi sensibiliza informasaun ba komunidade oinsá atu halo prevensaun ba moras dengue no moras seluk ne’ebé sempre mosu iha tempu udan.

Servisu Saúde Dili mós sei halo promosaun saúde liuhosi kanál mídia atu fó sai informasaun ba públiku kona-ba risku hosi moras dengue hahú husi ninia sintoma, tratamentu  no meius prevensaun sira.

”Ita-nia intervensaun mak distribuisaun ai-moruk abate ba iha Postu Adminsitrativu Dom Aleixo ,tanba durante ne’e sira mak iha kazu dengue maka’as tanba iha fulan-janeiru to’o novembru iha kazu dengue hamutuk 811 no mate nain hitu,” dehan nia iha ninia servisu fatin, kinta ne’e.

Tuir observasaun daudaun ne’e lixu barak mak namkari iha komunidade sira-nia hela fatin liliu lata mamuk no botir mamuk ne’ebé fasil atu susuk moris ba.

Notísia Relevante :Kazu Moras Dengue Sai Ameasa Ba Saúde Públika

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here