DILI, 14 fevereiru 2020 (TATOLI)—Diretora Jerál Prestasun Saúde, Odete Viegas da Silva hateten, moras dengue sai hanesan ameasa ba saúde públika nian tanba kazu komesa mosu iha Munisípiu Ermera ho pasiente hamutuk ema na’in 80.

“Tinan-tinan kazu kontinua aumenta ba beibeik. Entaun, agora daudaun kazu komesa mosu iha Munisípiu Ermera ho pasiente hamutuk ema na’in 80. Husi Minitériu Saúde mós nia ekipa dengue iha hodi halo kedas intervensaun. Agora daudaun ekipa mós tun ona ba atu halo abate no rega susuk ne’e, nomós halo sensibilizasaun ba komunidade sira,” dehan Odete Viegas da Silva ba jornalista sira iha Timor Plaza, ohin.

Nia hatutan, Timor-Leste mós bele haree ba moras Coronavirus maibé tenke haree mós moras dengue tanba kazu dengue ne’ebé mosu iha Munisípiu Ermera ne’e, Timor-Leste mós tenke evita hodi labele da’et no akontese ba munisípiu seluk.

“Dalaruma munisípiu seluk mós dengue mosu ona maibé pontu vokál husi munisípiu hotu-hotu, karik kolekta kolekta dadus hodi informa kedas mai iha vizilansia departamentu epidimolojia nian. Kazu saida mak mosu ne’e husi vizilansia sempre haree no sira sempre kontaktu 24 oras no ekipa tuun kedas. Agora daudaun ami sei halo desiminisaun informasaun la’os Coronavirus de’it maibé ba mós moras dengue,” nia dehan.

Malária iha RAEOA Hahú Elimina

Entretantu, Serbisu Saúde RAEOA-ZEESM informa, dadus estatistika husi Serbisu Saúde Rejionál kona-ba moras malária iha Oe-Cusse tinan hirak liu ba hatudu katak kazu malária iha RAEOA hahú elemina kompara ho tinan hirak liu ba.

“Iha tinan 2016 kazu ne’ebé relata hamutuk 88. Husi totál númeru ne’e, kazu 78 hetan transmisaun husi rai laran no kazu 10 importa husi nasaun viziñu Indonézia hanesan husi Atambua, Kupaun, Kefa no Naktuka,” haktuir Komunikadu Imprensa husi Media RAEOA-ZEESMTL ne’ebé Ajénsia TATOLI asesu, ohin.

Iha tinan 2017, komunikadu ne’e haktuir, iha kazu 10 ne’ebé hetan transmisaun husi rai laran no iha tinan 2018 iha kazu haat (4) ne’ebé hetan transmisaun husi rai liur. Iha tinan 2019, iha kazu rua (2) ne’ebé hetan mós transmisaun husi rai liur.

Atu elimina moras malária iha Oe-Cusse, Serbisu Saúde RAEOA daudaun hala’o hela programa fahe moskiteiru ba komunidade iha Postu Administrativu Nítibe, Oe-Silo, Pásabe no Pante Makasár.
Servisu Saúde Rejionál RAEOA mós kuntinua asegura tratamentu ne’ebé hala’o husi pesoál saúde sira hanesan fahe aimoruk no halo nafatin monitorizasaun ba moras malária.

Hodi mellora prosidementu elemina moras malária iha teritóriu laran, peritu sira husi rai liur ne’ebé oras ne’e hala’o hela sira-nia observasaun iha Timor-Leste sei aprezenta dadus hirak ne’e ba Ministériu Saúde no parseiru sira iha loron 21 fevereiru 2020 iha Timor Plaza-Dili.

Iha sorumutu ne’e, sei fornese sujestaun no rekomendasaun ba Ministériu Saúde hodi hamosu plataforma foun hodi kombate moras malária tuir polítika Governu Timor-Leste nian.

Hodi hatan ba polítika Timor-Leste livre ona husi Malaria iha tinan 2021, Serbisu Saúde RAEOA hamutuk ho espesialista sira husi rai liur hanesan espesialista Vizilânsia Resposta Rápida husi Universdade Medicina Colombo, Sri Lanka Profesor Rajitha, espesialista ba Diagnostika no Tratamentu Jestaun kona-ba Malária, dra. Srivicha inklui delegadus husi Universidade Mahidol Tailandia, ACT Malária Network Philipina no espesialista kona-ba apoiu Jestaun Rekursu Humanu husi India halo avaliasaun no monitorizasaun kona-ba impelementasaun programa malária iha RAEOA.

Programa ne’ebé hala’o iha Sakato, Oe-Cusse iha loron 12 Fevereiru 2020 ne’e nu’udar programa vizilansia epidemilojia ho asaun rápidu bainhira mosu sintoma ruma husi moras malária.

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here