AJTL halo konferénsia imprensa hodi kontesta notísia TATOLI, I.P.

DILI, 04 dezembru 2020 (TATOLI) – Asosiasaun Jornalista Timor Lorosae (AJTL) liuhosi konferénsia imprensa, ohin, iha Fatuhada, kontesta notísia balun hosi TATOLI,l.P, tanba konsidera laiha prinsípiu cover both side ka kobre parte rua.

“Husu ba redasaun TATOLI atu garante prinsípiu cover both side”, Portavóz AJTL, Aniceto dos Reis, deklara perante jornalista sira hodi refere ba publikasaun TATOLI.

Kronolojia, tuir portavóz ne’e, AJTL konsidera notísia ne’ebé ajénsia Estadu ne’e públika iha loron 9 jullu 2020 no 20 novembru la tuir padraun jornalístika, kódigu étika jornalizmu no prinsípiu jornalizmu kobre parte rua tanba laiha konfirmasaun ho parte asosiasaun.

Aniceto dos Reis hanesan mós Vise-Prezidente AJTL hatutan loloos redasaun TATOLI mós tenke kestiona rezultadu konferénsia TLPU (Timor-Leste Press Union) ne’ebé realiza ho rekizitu hanesan, maibé TATOLI nunka kestiona.

AJTL konsidera eleisaun iha konferénsia, loron 4 jullu 2020, nu’udar rezultadu finál no desizaun aas-liu ne’ebé konferensista sira foti hodi fó fiar ba eis-Prezidente AJTL, Virgílio Lamukan Guterres atu reprezenta jornalista sira hodi sai membru Konsellu Imprensa (CI, sigla portugés) ba períodu 2020.

Asosiasaun ne’e nomeia Virgílio Lamukan Guterres tanba nia hanesan membru ativu ne’ebé durante ne’e reprezenta asosiasaun hodi promove dezenvolvimentu mídia iha rejiaun Sudeste Aziátika no iha mundu.

AJTL konsidera mós katak Parlamentu Nasionál la kompátivel hodi kontesta rezultadu eleisaun iha loron 4 jullu 2020.

Ho pozisaun ne’e, AJTL aléinde husu ba TATOLI atu garante prinsípiu cover both side, husu ba CI atu superviziona produtu jornalístiku sira inklui husu ba membru AJTL no jornalista hothotu atu mantein serbisu profisionál.

Tuir kódigu étika jornalizmu no prinsípiu universál jornalizmu nian, tanba estrutura AJTL daudauk ne’e esforsu hela hodi kria programa oioin atu hametin membru sira-nian kompeténsia iha área jornalizmu, liuliu kontinua halo advokasia ba nia membru sira, portavóz AJTL ne’e hateten.

Iha parte seluk, Reprezentante Konsellu Redasaun TATOLI,I.P, Rafael Belo, defende ho rezultadu analiza konteúdu (content analysis) hosi notísia ne’ebé AJTL kestiona.

Analize konteúdu ne’e halo ba notísia tolu ho títulu, 1) Petisaun jornalista na’in-31 halo PN adia eleisaun ba membru Conselho de Imprensa, ne’ebé TATOLI publika iha loron 20 novembru 2020, ho kategória polítika no nasionál ho 2) Conselho de Imprensa seidauk simu notifikasaun hosi Komisaun A, ne’ebé publika iha loron 25 novembru 2020, ho kategória polítika no nasionál.

Analiza ne’e hatudu katak notísia dahuluk ho item notísia 1 no nia frekuénsia 1 husi item válidu 1 ho pursentu kumulativu 100.0%. Tipu lead uza lead direta ka direct lead, formatu notísia stright news, ho faktu kompleta ho fórmula 5W + 1H (Who, what, where, why no how) no kompleta ho fundu informasaun (background).

Haree ba valór notísia (atualidade, konflitu (diferente ideia), proximidade, prominénsia, interese umanu), iha notísia rua dahuluk bazea ba rezultadu analiza kada item ho ferramenta SPSS (Statistical Product and Service Solutions) hatudu katak iha kategória no klase, valór notísia ho kategória atualidade no interese umanu mak hetan baixu ka tuun liu tanba bazea reabilidade dadus ho sasukat (altu, médiu no baixu) husi frekuénsia 1 ho item válidu 1 hamutuk 16.7%. Nune’e mós porsentu kumulativu (16.7%).

Tuirmai, valór notísia ho kategória konflitu (diferente ideia), proximidade, prominénsia no emosaun ho frekuénsia 4 husi item válidu 3 hatudu katak 66.7% no porsentu kumulativu 83.3%.

Nune’e mós valór notísia ho kategória atualidade mak altu husi frekuénsia 1 ho item válidu 5 ka ho 16.7% no pursentu kumulativu 100.0%. Dadus numériku ne’e hetan husi reabilidade dadus ho sasukat (altu, médiu no baixu) ne’ebé husi 5 ba 1 kada kategória.

Tanba ne’e, rezultadu bele konklui katak altu mak dominante no tuirmai médiu. Nune’e, bele interpreta katak notísia ne’e promove valór notísia ATUALIDADE liu depois mak valór notísia ho kategória konflitu (diferente ideia), proximidade, prominénsia no emosaun.

Kona-ba notísia daruak, rezultadu analiza konteúdu hatudu, notísia ne’e ho frekuénsia 1 husi item válidu 1 ho porsentu kumulativu 100.0%. Tipu lead uza direta ka direct lead, formatu notísia stright news, ho faktu kumpleta ho formula 5W + 1H no kompleta ho fundu informasaun (background).

Refere ba iha valór notísia (atualidade, konflitu (diferente ideia), proximidade, prominénsia, interese umanu) bazea ba rezultadu analiza kada item iha kategória no klase iha coding sheet ho reabilidade dadus ho sasukat (altu, médiu no baixu) hatudu katak iha kategória no klase, valór notísia ho kategória atualidade no interese umanu mak hetan baixu ka tuun liu tanba bazea reabilidade dadus ho sasukat (altu, médiu no baixu) husi frekuénsia 2 ho item válidu 1 hamutuk 33.3%. Nune’e mós porsentu kumulativu (33.3%).

Tuirmai, haree ba valór notísia hanesan konflitu ka diferente idea, proximidade, prominénsia no emosaun nia rezultadu médiu husi frekuénsia 4 ka 66.7% no porsentu kumulativu 100.0%. Ho dadus sira ne’e bele konklui katak valór notísia klarak ka médiu mak dominante liu duké aas.

Nune’e altu laiha tanba notísia analizada nu’udar notísia konfirmasaun ida husi notísia anteriór, maibé laós iha loron ne’ebé hanesan depois publikasaun notísia, maibé liu tiha loron lima (5).

“Biar nune’e, notísia ne’e konsege kompleta notísia anteriór tanba natureza mídia online ne’e HIPERLINK KA HIPERLIGASAUN no UP TO DATE KA ATUALIZADU”.

Husi rezultadu analiza konteúdu ne’e, Responsável notísia portugés iha TATOLI, I.P ne’e konklui katak notísia rua ne’ebé AJTL kontesta, prienxe rekizitu cover both side tuir prinsípiu jornalizmu nian no iha valór tanba missing error hothotu 0 (zero) eseptu atualidade mak la konsege up to date ka atualiza iha loron ne’ebé mak hanesan.

Partisipa iha konferénsia imprensa ne’e mak Prezidente AJTL, Zevonia Vieira ho membru estrutura mak Aveiro Ximenes no Constâncio Vieira.

Notísia relevente: AJTL Husu PN Atu Anula Petisaun Jornalista 31

Conselho de Imprensa seidauk simu notifikasaun hosi Komisaun A

Jornalista: Osória Marques
Editora: Maria Auxiliadora

HAKEREK NO HATÁN

Please enter your comment!
Please enter your name here