Zevonia ne’ebé akompaña hosi membru seluk liuhosi konferénsia imprensa ne’ebé hala’o iha sede AJTL, Fatuhada, sesta ne'e. Imajen/Osória Marques.

DILI, 10 jullu 2020 (TATOLI)–Asosiasaun Jornalista Timor Lorosa’e (AJTL) liuhosi ninia prezidente, Zevonia Vieira, ho membru sira seluk husu ba Parlamentu Nasionál (PN) atu anula petisaun jornalista 31 ne’ebé aprezenta hosi Inisiadór Petisaun Atuál Jornalista Timor Post, Noemio Falcão.

Notísia Relevante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

“Ami husu ba Parlamentu Nasionál atu labele konsidera karta petisaun ne’e, tanba sira viola desizaun konferénsia AJTL nian hodi hili Virgilio “Lamukan” Guterres hanesan membru AJTL ne’ebé sai nu’udar membru Conselho de Imprensa ba periódu 2020–2024,” dehan Zevonia ne’ebé akompaña hosi membru seluk liuhosi konferénsia imprensa ne’ebé hala’o iha sede AJTL, Fatuhada, sesta ne’e. 

Enkuantu tuir dokumentu ne’ebé jornalista Tatoli halo peskiza liuhosi portal https://www.conselhoimprensa.tl/tl/politika/legislasaun/dekretu-lei/summary/3-dekretu-lei/2-decreto-do-presidente-da-repu-blicano-57-2015, haktuir iha dekretu lei númeru 25/2015 artigu 17 alinea 8 dehan Conselho de Imprensa (CI) mak iha kompeténsia atu organiza eleisaun ba reprezentante jornalista no órgaun komunikasaun sosiál sira-nian tuir regulamentu rasik.

Liuhosi konferénsia ne’e, Zevonia konsidera membru AJTL ne’ebé asina petisaun ho Noemio halo traisaun no viola regra organizasaun, tanba ne’e husu ba públiku atu lalika fiar grupu sira ne’ebé asina petisaun.

“Husu membu AJTL balu ne’ebé karik asina karta petisaun ne’e d’ak-liu sees daudaun ona hosi asosiasaun ne’e, tanba aktu ne’ebé ita-boot sira halo ne’e nu’udar traisaun boot ba AJTL hanesan organizasaun no ninia prinsípiu sira,” akresenta tan Zevonia.

Nia argumenta, tuir estatutu organizasaun nian, membru AJTL no ema ne’ebé mak tuir kongresu iha sábadu liubá iha direitu absoluta atu fó sira-nia votu. Tanba ne’e, husu ba Noemio Falcão atu hatudu sé mak ativista loos iha kongressu ne’e.

Artigu seluk hosi dekretu lei númeru 25/2015 (Kriasaun no Estatutu KI) iha alinea 6 hatete direitu atu vota ba reprezentante jornalista sira nian maka jornalista sira ho karteira profisionál fó-sai hosi Konsellu Imprensa, no sira la hala’o knaar sira ne’ebé la hanesan ho profisaun jornalista nian tuir artigu 17 hosi Lei Komunikasaun Sosiál nian mak; funsionáriu públiku; titulár ba kargu iha órgaun soberania ida, iha órgaun podér lokál ka lideransa komunitária, dirijente partidu polítiku, relasaun públika ka asesór ba imprensa, komunikasun no imajen, atividade sasán de’it ne’ebé ho rohan hodi promove bein ka servisu liuhosi forma publisidade.

Nia esplika estatutu AJTL la-hanesan ho estatutu organizasaun sira seluk; AJTL nakloke ba peskizadór, blogger, fotografer no ema sira ne’ebé mak hala’o knaar jornalístiku nian, ne’e bele tama iha assosiasaun. Tanba misaun AJTL nian iha rua mak luta ba liberdade imprensa no liberdade espresaun; signifika ema ne’e iha direitu atu luta hodi defende.

“Noemio Falcão ne’e la’ós membru AJTL atu tau nia kanuru tohar ba assosiasaun atu kontra estatutu kongresu ne’e, tanba iha ne’ebá hatudu ona katak ‘Lamukan’ mak manan absoluta ho nia votu hamutuk 221,” akresenta Prezidente AJTL ne’e.

AJTL konsidera, grupu ne’ebé asina petisaun hakarak hamonu imajen AJTL nian no misaun polítika ne’ebé mak atu hamate liberdade imprensa no liberdade espresaun. Tanba grupu petisionáriu ne’e rasik a-favór ba esbosu lei kriminalizasaun difamasaun iha Timor-Leste, afirma Zevonia.

Dala ida tan nia hatutan, desizaun kongresu AJTL iha loron 4 fulan-jullu liubá maka desizaun ne’ebé mak aas liu buat hotu, tanba konfresista na’in-221 mak fó votu ba Virgílio ‘Lamukan’ Guterres no konfrensista na’in-24 mak fó votu ba Rita Almeida.

“Rezultadu eleisaun konferénsia iha 4 jullu 2020 ne’ebé konferensista maiória hili Virgilio “Lamukan” Guterres, ho ne’e halo ema balun ho nia grupu kestiona legalidade no lejitimidade vitória Lamukan Guterres,” dehan nia.

Zevonia hateten, AJTL kontinua afirma rezultadu eleisaun iha 2020 nu’udar rezultadu finál no desizasaun aas-liu ne’ebé konferensista sira foti hodi fó fiar ba eis-Prezidente AJTL, Virgilio “Lamukan” Guterres atu reprezenta jornalista sira hodi sai membru CI periodu 2020 to’o 2024. 

“AJTL nomea Virgílio ‘Lamukan’ Guterres nu’udar ninia reprezentante asosiasaun hodi promove dezenvolvimentu mídia no jornalizmu iha rejiaun aziátika no iha mundu,” nia akresenta.

Entretantu, Inisiadór Petisaun no Atuál Jornalista Timor Post, Noemio Falcão, hateten nia halo petisaun ne’e la’ós tanba hafalun ho motivu polítika ruma maibé halo petisaun tanba prosesu eleisaun ne’ebé Conselho de Imprensa realiza iha sábadu (04/07/2020) ne’e ninia legalidade.

“Petisaun ho motivu polítiku ne’e la loos. Ne’e akuzasaun falsu. Hanesan jornalista ne’e ko’alia ho faktus. Laiha forsa polítika ida mak hamriik iha ha’u-nia kotuk hodi inísia prosesu ne’e. Tanba, hatudu momoos  violasaun malorek ba lei komunikasaun sosiál iha prosesu eleisaun ba reprejentante jornalista ne’ebé Conselho de Imprensa organiza iha loron 04 fulan jullu ne’e,” dehan Inisiadór Petisaun, Noemio Falcão, ba Agência TATOLI liuhosi WhatsApp, sesta ne’e.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here