Prezidente Konsellu Imprensa, Virgilio Guterres bainhira ko'alia iha seminar internasional, ohin iha Delta Nova. Foto Tatoli/Antonio Goncalves

DILI, 25 novembru 2020 (TATOLI)—Conselho de Imprensa (CI) lideradu Virgílio Guterres seidauk simu notifikasaun ruma hosi Komisaun A (Justisa no Konstitusionál) relasiona ho petisaun hosi jornalista na’in-31 ne’ebé kestiona legalidade konferénsia Asosiasaun Jornalista Timor Lorosa’e (AJTL) nian ne’ebé hala’o iha Salaun Detla Nova, iha loron 4 fulan-jullu 2020 liubá.

Notísia Relevante: Komisaun A sei aprezenta pareser petisaun jornalista 31 ba plenária

“To’o agora Conselho de Imprensa seidauk simu notifikasaun ruma hosi Komisaun A maibé sé notifikasaun ne’e mai Conselho de Imprensa iha obriasaun atu hatán ba kestaun sira-ne’ebé parlamentu hato’o, preferénsia barak liu hanesan responsável ba prosesu sira-ne’ebé halo iha konferénsia ne’e,” Prezidente CI informa ba jornalista sira iha edifísiu IOB, tersa ne’e.

Prezidente CI ne’e orienta ona funsioáriu sira buka lista vizitante sira bainira ema ruma vizita CI maibé la identifika ema ruma hosi Parlamentu Nasionál haruka karta.

“Ami-nia ho sekretariadu konfirma ho gabinete Komisaun A ninian katak laiha karta ida mak fó mai ami, to’o sesta, 20 novembru ne’e ami hala’o sesaun plenária laiha ajenda kona-ba ida-ne’e,” nia dehan.

Prezidente CI ne’e dehan, bainbain karta ruma mai hosi órgaun ka instituisaun haruka karta ruma ka asuntu ruma, ezekutivu CI nian sempre tau iha ajenda atu sai diskusaun.

“Ne’ebé, ami sei ba kuandu notifikasaun ne’e mai. Ami ba atu esplika prosesdimentu iha prosesu konferénsia sira-ne’e hotu bazea ba notifikasaun ne’ebé parlamentu notifika,” nia hateten.

Maske nune’e, Prezidente Komisaun A, Deputadu Joaquim dos Santos, dehan komisaun haruka ona karta Prezidente CI, Virgílio Guterres, iha loron 29 outubru 2020.

“Karta ne’e ami haruka dezde 29 outubru 2020 no karta tama ona ba iha-ne’ebá no CI fó mós dokumentu mai ami katak karta ne’e tama tiha ona. Iha karta ne’e, ha’u husu ba señor Virgílio atu esklarese prosesu konferénsia ne’e mai komisaun A para Komisaun A halo audiénsia ho petisionáriu sira, tanba sira kontesta legalidade señor Virgílio nian hodi reprezenta jornalista timoroan sai membru CI liuhosi konferénsia AJTL nian,” Prezidente Komisaun A ne’e informa ba Ajénsia TATOLI, kuarta ne’e.

Prezidente Komisaun ne’e mós lamenta tanba prazu loron 15 ne’e liu dook tiha ona maibé CI seidauk fó resposta ba notifikasaun ne’e.

“Aban ka bainrua ha’u sei haruka karta daruak ba, nia tenke esklarese tiha para ami bele halo audiénsia ho petisionáriu sira tanba ne’e ligadu ho petisaun,” nia dehan.

Prezidente Komisaun A ne’e subliña, petisaun sei aprezenta paresér ba plenária hodi halo diskusaun maibé labele rona parte ida, tenke rona parte rua.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here