Sekretáriu Estadu Arte no Kultura (SEAK) Teofilho Caldas.Imajen/Tome Amado.

DILI, 02 dezembru 2020 (TATOLI)—Sekretáriu Estadu Arte no Kultura (SEAK) Teofilho Caldas, hateten prevee ona osan rihun $40-resin iha Orsamentu Jerál Estadu 2021 hodi halo peskiza ba uma lisan iha territóriu Timor-Leste.

Peskiza ne’e ho objetivu atu identifika totál uma lisan iha rai-laran hamutuk hira?, kategoria uma liurai hira?, uma dato baibain, uma lulik seguransa nune’e bele konserva hanesan patrimoniu kulturál iha futuru.

Notísia Relevante :Governu Prepara Formuláriu Rihun 10-Resin Atu Fahe ba Uma-Lisan iha TL

“Ita identifika ona Munisípiu lima mak sei sai alvu bá peskiza dahuluk mak Munisípiu Baucau,  Viqueque, Lospalos, Ermera no Ainaro,” nia informa ba jornalista sira iha salaun Ian Martin INFORDEPE, Matadouro Dili.

Governu Konstitusionál daualu liuhusi SEAK atu prepara dadus kona-ba totál uma lisan iha TL, nune’e bele sai arkivu ba jerasaun foun ka akadémiku sira atu uza iha sira-nia peskiza.

Iha tinan 2019, SEAK halo ona peskiza kona-ba patrimoniu kulturál ne’ebé refere liu ba barlake, estrutura uma lulik, ejisténsia uma lulik.

“Governu mós halo ona peskiza ba uma lulik no oras ne’e, prodúz ona ba livru no halo ona lansamentu, livru ne’ebé mak prodúz ne’e kona-ba uma lulik ida iha Marobo(Bobonaro),  Oe-Cusse no Ainaro,” dehan nia.

Tuir proposta provizóriu ne’ebé SEAK simu husi komunidade sira husi Munisípiu 12 inklui Rejiaun Administrativa Espesiál Oe-Cusse Ambeno (RAEOA) rejista uma lisan hamutuk 238 maka ejizte iha Timor-Leste.

“Ida ne’e latama iha planu peskiza ne’ebé mak SEAK sei halo iha tinan oin tanba proposta 238 ne’dadus komunidade nian ne’e husu governu atu fó apoiu,” nia hateten.

Notísia Relevante :Autoridade Covalima Hahú Rekolla Dadus Naran Uma Lisan

Jornalista : Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here