Ministru ba Asuntus Kombatentes Libertasaun Nasionál, Júlio Sarmento da Costa "Meta Mali". Imajen/Egas Cristovão

DILI, 14 jullu 2020 (TATOLI)–Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, informa MAKLN prepara ona formuláriu hamutuk rihun 10-resin atu fahe ba uma-lisan sira iha territóriu Timor-Leste.

Notísia Relevante: Governu iha Planu Atu Harii Monumentu iha Postu Administrativu 65

“Formuláriu rihun 10-resin preparadu tiha ona no hein atu tún ba uma-lisan hodi fahe ba sira no sira prenxe, tanba atu hatene ema mate oin nusá. Iha funu-laran mate oinsá. Entaun ho dadus hirak ne’e hotu ita bele hahú ona ho monumentu sira,” dehan Ministru Asuntu Kombatente Libertasaun Nasionál (MAKLN), Júlio da Costa ‘Meta Malik’, ba jornalista sira iha Palásiu Governu, Dili, tersa ne’e. 

Ho polítika ida-ne’e, nia dehan, Sekretáriu Estadu Kombatente Libertasaun Nasionál (SEKLN) sei tún ba terrenu hodi halo sensibilizasaun ba komunidade, hodi ko’alia ba malu, rona malu, tanba buat hotu preparadu tiha ona.

Nia hateten, maneira ida-ne’e mak Governu bele bele hatene tuir ema na’in hira mak mate, hafoin ne’e mak Governu hanoin atu hakerek de’it ema mate sira-nia naran kompleta mak tau iha monumentu sira iha Timor laran. Ho ida-ne’e bele redúz ona despeza estadu nian.

“Entaun iha moumentu ne’e ita hakerek tiha naran ba fatuk nia lolon mak ita hodi dignifika sira no aumezmu tempu ita taka ho dezlutu nasionál. Ho ne’e mak bele ramata ona prosesu martir-sira nian no ita hakat ona ba dezenvolvimentu. Ho ida-ne’e, bele redúz ona despeza Estadu nian,” nia hateten. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here