Enkontru entre prezidente autoridade munisípiu ho xefe suku sira. Foto: Tomé Amado

COVALIMA, 3 Setembru 2019 (TATOLI)– Autoridade Munisípiu Covalima realiza enkontru ho Autoridade Postu Administrativu (APA) hitu (7) no Xefe Suku 30 hodi orienta serbisu atu hahú rekolla dadus naran uma lisan hotu iha Covalima.

Administradór Munisípiu Covalima, Afonso Nogueira Nahak dehan, prosesu rekolla dadus naran uma lisan ne’e sei entrega ba Governu Timor-Leste liuhusi Sekretáriu Estadu Kombatente Libertasaun Nasionál (SEKLN) hodi rejista nu’udar patrimóniu kulturál Timor-Leste nian ne’ebé governu sei uza hodi halo polítika planu dezenvolvimentu nasionál.

Nia dehan, prosesu rekolla naran uma lisan ne’e SEKLN maka orienta iha munisípiu hotu- hotu.

“Enkontru regulár ida ne’e atu introdús husi karta Sekretáriu Antigu Kombatente Libertasaun Nasionál (SEKLN) atu halo rekollamentu ba dadus uma lisan tomak iha Covalima ne’ebé sei entrega ba governu iha tempu badak,” dehan Administradór Covalima Afonso iha salaun Administrasaun Covalima.

Nia husu ba xefe suku 30 atu tun ba foti dadus tuir ho loloos hodi labele hamosu lista naran ne’ebé hanesan entre naran uma lisan sira.

Tuir planu, hafoin rekolla dadus ne’e, Autoridade Munisípiu Covalima sei entrega ba governu iha loron 10 fulan Outubru 2019.

“Objetivu prinsipál rekolla uma lisan ne’e halo hotu tiha, aban bairua Sekretáriu Estadu Antigu Kombatente Libertasaun Nasionál sei haruka fila fali formuláriu ida mai para halo fila fali levantamentu dadus ba maluk sira ne’ebé mate durante funu tinan 24 too termina iha 1999, para buka hatene loloos ema Timoroan hira maka mate iha Timór husi uma lisan idak-idak,” nia hatete.

Entretantu, durante enkontru Administradór Postu Administrativu hitu (7) Fatululik, Fatumean, Fohoreen, Mape-Zumalai, Maukatar, Suai no Tilomár ho Xefe 30 promete sei organiza ekipa rekolla dadus too aldeia 160 para hato’o relatóriu dadus uma lisan ho kompletu.

Jornalista: Eugénio Pereira

Editór       : Rafy Belo

HAKEREK NO HATÁN

Please enter your comment!
Please enter your name here