Prezidente Autoridade Munisípal Dili, Gaspar Soares. Imajen/Tatoli

DILI, 02 dezembru 2020 (TATOLI)—Autoridade Munisípiu Dili hamutuk ho Fundasaun Alola, kuarta ne’e halo ona avaliasaun periódika ba implementasaun Planu Asaun Komunidade ba Saneamentu no Ijiéne PAKSI no grupu suporta inan ba suku 36 iha Munisípiu Dili.

”Ita halo avaliasaun periódika relasaun no implementasaun PAKSI nivel Munisípiu Dili no PAKSI ne’e ita hotu hatene katak hanesan meiu ida para oinsá atu hadi’a saúde no má-nutrisaun komunidade nian,” Prezidente Autoridade Munisípiu Dili, Gaspar Soares, iha ninia diskursu iha salaun Lux Clarita Dili.

Notísia Relevante :Programa PAKSI Sei Konsentra Mós ba Asuntu Má Nutrisaun

PAKSI ne’e meius ida atu garante ambiente seguru no moos, livre husi ema soe fo’er arbiru ba komunidade liliu labarik sira.

“Ita hotu hatene katak grupu suporta inan ne’e komunidade ninia servisu voluntáriu no grupu ne’e nia kna’ar importante tebes oinsá atu ajuda inan no oan sira iha nivel suku no mós ajuda servisu emerjénsia balun liliu relasaun saúde inan no oan iha suku sira,” nia dehan.

Nia dehan antes Munisípiu Dili deklara livre husi soe fo’er boot arbiru, tenki garante duni katak uma-kain sira iha Dili iha ona hariis fatin rasik.

“Tuir planu katak Timor -Leste deklara alfa iha tinan 2021 tanba uma kain Dili nia balun sentina iha balun seidauk iha tanba ne’e mak garante uma-kain iha Munisípiu Dili tenke iha hotu sentina n’ebé mak saudavel,” katak nia.

Iha fatin hanesan Diretora Ezekutiva Fundasaun Alola, Maria Imaculada Guterres, hateten implementa ona programa ne’e liliu halo promosaun saude ba inan no oan.

Programa PAKSI ne’ebé implementa iha Postu Administrativu Atauro iha Suku lima ho totál aldeia 19. Maibé populasaun aldeia 10 maioria seidauk iha sintina ho totál uma-kain 230.

Iha Postu Adminsitrativu Cristo Rei  ho totál suku ualu, aldeia 19,  aldeia 10  ho uma-kain 760l laiha sintina.

Postu Administrativu Dom Aleixo, iha suku hitu, aldeia iha 71, uma-kain tolu husi aldeia  ida maka  mak laiha sintina.

Postu Adminsitrativu Metinaro iha suku tolu no iha aldeia 14,  aldeia 11 ho uma-kain ne’ebé mak laiha sintina hamutuk 231.

Iha Postu Adminsitrativu Nain Feto iha suku neen, aldeia 38, populasaun husi aldeia 3 ho uma-kain 30 maka laiha sintina.

Iha Postu Administrativu Vera Cruz iha suku hitu,  aldeia 48, adleia haat ho populasaun uma-kain 86 mak laiha sintina.

Notísia Relevante :MS ho Autoridade Munisípiu Dili Sensibiliza Programa PAKSI ba Autoridade Lokál

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here