Logo Ministériu Saúde.

DILI,28 maiu 2020 (TATOLI)-Diretóra Servisu Saúde Munisípiu Dili, Agostinha Segurado, hateten liuhosi implementasaun Planu Asaun Komunidade Saniamentu no iIiéne (PAKSI) sei konsentra mós ba problema má nutrisaun inan no labarik kiik.

Programa PAKSI nu’udar abordajen importante atu hadi’ak saúde no nutrisaun iha mundu liliu atu garantia komunidade sira hodi livre husi soe fo’er arbiru no ambiente moos.

Tuir planu Ministériu Saúde ba tinan 2020 ne’e, Munisípiu Dili sai mós alvu ida atu implementa programa PAKSI hodi livre husi problema soe foer arbiru.

”Ita iha Dili suku iha 37 ne’ebé mak presiza duni halo provokasaun ida ne’e atu hato’o ba kada Xefe Suku no Xefe Aldeia sira atu identifika nia família hotu hotu ida ne’ebé mak sentina laiha no ida ne’ebé mak sentina iha,”informa nia ba Jornalista sira hafoin sensibiliza informasaun PAKSI ba Autoridade Lokál Suku Caicoli, kinta ne’e.

Nia dehan bainhira soe fo’er arbiru sei implika ba saúde públiku hodi afeta mós ba problema nutrisaun.

“Planu asaun ida ne’e mak hanesan kontinuasaun ba ita hotu atu hatene katak bainhira soe fo’er arbiru mak impaktu ida mós ba saúde publika liliu ba má nutrisaun,”tenik tan.

Tanba tuir dadus populasaun Timor-Leste pursentu 40 resin feto no labarik kiik maka sofre problema má nutrisaun.

Iha fatin hanesan Xefe Departementu Saúde Ambientál no Vijilánsia Sanitária, José Moniz, hateten Munisípiu Dili mós seidauk livre husi problema soe fo’er arbiru tanba tuir dadus sensu uma-kain 2015, populasaun pursentu 7% seidauk iha sentina.

“Iha ona Munisípiu neen mak deklara ona katak la soe fo’er boot arbiru mak Munisípiu Ermera, Aileu, Liquiça, Bobonaro, Manufahi, no Ainaro entaun ita hein tan ba Munisípiu Covalima para deklara katak livre husi soe fo’er boot,”dehan nia.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here