Toilet públiku Largo Lecidere. Imajén Tatoli/ Osória Marques

METINARU ,27 maiu 2020 (TATOLI)-Ministériu Saúde, reprezenta husi Diretóra Saúde Munisípiu Dili, Agostina Segurado ho Prezidente Autoridade Munisípiu Dili Gaspar Soares, kuarta ohin, halo sensibilizasaun informasaun ba autoridade lokál Postu Administrativu Metinaru kona-ba planu asaun komunidade sanitária ijiéne (PAKSI) hodi deklara livre husi so’e fo’er boot arbiru.

”Atividade provokasaun planu asaun komunidade sanitária ijiéne ne’e atu informa ba Autoridade Lokál sira iha Postu Administrativu Metinaro atu oinsá orienta komunidade sira la so’e fo’er arbiru,”dehan Agostina Segurado ba Jornalista sira iha Sentru Saúde Metinaro, kuarte ne’e.

Organizasaun Internasional hanesan UNICEF, Uniaun Europeia, nune’e mós Fundasaun Alola maka apoiu tékniku ba implementasaun iha terrenu liliu identifika komunidade iha área rurál na’in hira maka seidauk asesu sintina.

Tanba tuir nia katak so’e fo’er boot arbiru sei afeta ba saúde públiku komunidade nian hanesan diárea, moras kulit, Ispa ka infesaun vias respiratóriu no moras seluk tan.

Iha biban hanesan, Prezidente Autoridade Munisípiu Dili, Gaspar Soares hateten, tuir dadus sensu uma kain iha tinan 2015,rejista populasaun iha Dili pursentu 7 % maka laiha sentina, ne’e signifika komunidade sira sei so’e fo’er boot arbiru.

Xefe Sentru Saúde Metinaro, Alexandre Martins Casmiro hateten ekipa tékniku daudaun ne’e desloka ona bá iha terrenu hodi identifika númeru komunidade uma-kain hira maka seidauk iha sintina rasik.

”Ami agora daudaun ekipa sira ne’e preparadu hotu ona atu tun bá iha komunidade sira para identifika uma kain ida ne’ebé mak seidauk iha sentina,”nia hatutan.

Jornalista :Felicidade Ximenes

Editór       : Agapito dos Santos 

HAKEREK NO HATÁN

Please enter your comment!
Please enter your name here