Ekipa Servisu Investigasaun Kriminál (SIC) halo buska no tesi-kotu fiu koneksaun internet hosi Elite Computer ba liña ministériu-sira ne’ebé sentraliza iha edifísiu Elite Computer, Colmera, Dili. ImajenTatoli/Eugénio Pereira

DILI, 24 novembru 2020 (TATOLI)-Autoridade Polísia Nasional Timor-Leste (PNTL) liuhosi ekipa Servisu Investigasaun Kriminál (SIC), ohin, kontinua halo buska ba fatin kompañia Elite Computer hodi buka deteta prosesu koneksaun network fibra otika hosi Elite Computer liga ba kompañia Telekomunikasaun Telemor nian ne’ebé sentraliza iha edifísiu CBD-2,Timor Plaza, Dili.

Notísia Relevante : SIC detein jestór prinsipál Telemor ho Elite Computer

Prosesu investigasaun  lidera nafatin hosi Komandante SIC, Superintendente Xefe, José Maria Neto Moc ho ekipa IT Timoroan-sira envolve direita suspeitu DP nu’udar jestór prinsipál ba kompañia Elite Computer.

Halo tiha identifikasaun, ekipa deside tesi-kotu rede koneksaun internet hosi kompañia Elite Computer ba liña ministériu-sira, inklui instituisaun Governu no Komandu Polísia Nasionál Timor-Leste (PNTL) nian.

Antes tesi-kotu fiu koneksaun internet ne’e, SIC rekolla hotu ona dadus no naran liña ministériu-sira ne’ebé durante ne’e halo kontratu servisu ho kompañia ne’e.

Ekipa SIC mós halo kedas apreensaun ba dokumentu importante balun, inklui materiál-sira hanesan, data center, laptop, komputadór no sasán evidénsia seluk tan.

Dadus ne’ebé Agência Tatoli ases kona-ba liña ministériu-sira ne’ebé halo kontratu ho Elite Computer hodi fornese liña internet mak hanesan Ministériu Administrasaun Estatál (MAE) (Kontratu kansela ona),  Inspetór Jerál Estadu (IGE) inklui Komandu PNTL ne’ebé halo koneksaun ba rede internet ba CCVT iha kapitál Dili no Postu Integradu-sira iha fronteira terrestre Timor-Leste ho Indonézia.

Advogadu privadu hosi Juristas Advocasia, Julio Pereira Cardoso akompaña ninia kliente nu’udar suspeitu ho inisiál  DP asina karta deklarasaun hodi bele ba defende nia kliente iha prosesu primeiru interrogatóriu iha Tribunál Dili.

SIC mós kontinua elabora investigasaun ba jestór prinsipál operadór Telekomunikasaun Telemor ho inisiál TVB ne’ebé akompaña hosi nia advogadu privadu, Pedro Aparicio iha edifísiu SIC, Komandu Jerál PNTL.

 Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here