Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão.

BAUCAU, 24 novembru 2020 (TATOLI)—Vise Primeiru-Ministru no Ministru Planu no  Ordenamentu, José Maria dos Reis, informa ninia parte fó importansia ba lei ordenamentu territóriu tanba hanesan instrumentu importante ba apoiu prosesu dezenvolvimentu nasionál.

José Maria dos Reis hato’o asuntu ne’e bainhira halo abertura ba programa diskusaun kona-ba lei ordenamentu territóriu ne’ebé hala’o iha Munisípiu Baucau, tersa (24/11).

Notísia Relevante :MOP Sei Koordena ho MPOT Diskute Dekretu-Lei Tolu ba Planu Urbana

“Ita hotu haree iha Dili no iha Baucau rasik susar tebes, tinan 10 to’o 20 oin mai tan ita la hatene loos espasu iha ne’ebé tan mak ita atu jere hodi halo dezenvolvimentu iha nasaun ne’e,” katak Governante.

Planu ordenamentu nasionál hodi define zona no edifikasaun, área abitasaun, agrikultura no indústria inklui infraestutura atu bele haforsa implementasaun

Governu halo ona estudu viabilidade no dekretu lei kona-ba ordenamentu territóriu maibé presiza kria liña koordenasaun di’ak antes tama ba iha prosesu implementasaun.

“Ho planu sira ne’e rasik presiza halo desiminasaun hodi nune’e bele hetan diskusaun ida sériu entre parte hotu ne’ebé relevante  nune’e bele nakfila ba lei ida hodi reforsa dezenvolvimentu iha Timor-Leste,” katak atuál Vise Primeiru-Ministru iha Governu Konstituisaun daualu ne’e.

Iha fatin hanesan Ministru Administrasaun Estatál (MAE), Miguel de Carvalho, husu ba Autoridade Munisípiu Baucau, Lautem no Viqueque atu akompana diskusaun lei ordenamentu territóriu ne’ebé hatuur ona iha lei númeru 6/2017, abríl kona-ba baze ordenamentu territóriu ne’ebé aprova ona.

“Ita hotu haree problema barak iha Kapitál Dili, tanba ne’e iha husu atu problema sira ne’e labele afeta b fali Munisípiu bo’ot sira seluk hanesan Baucau, Ermera, no Bobonaro,” katak nia.

Entretantu, ekipa tékniku halo diskusaun kona-ba lei ordenamentu territóriu ne’e durante semana ida iha Munisípiu Baucau.

Notísia Relevante :2021, MPO prioritiza planu nasionál ordenamentu territoriál

Jornalista: Tomé Amado

Editór: Agapito dos Santos

1 KOMENTÁRIU

  1. Espera governo ida nee hanoin netik povo iliomar atu hadia estrada diresaun husi lospalos ba iliomar tamba desde ukun an too agora governo troka malu dala barak ona maibe nungka hanoin atu tau netik iha sira nia plano para hadia estrada nee.

HAKEREK NO HATÁN

Please enter your comment!
Please enter your name here