Vise Primeiru-Ministru no Ministru Planu no Ordenamentu, José Maria dos Reis. Imajen TATOLI/Egas Cristovão

DILI, 11 novembru 2020 (TATOLI)-Ministériu Planu no Ordenamentu (MPO) prevee  verba iha Orsamentu Jerál Estadu 2021 hamutuk $15.211.168 hodi prioritiza Planu Nasionál Ordeanmentu Territoriál (PNOT) hodi fó dalan ba dezenvolvimentu nasionál sai integradu no sustentável.

Husi totál $15.211.168, fahe ba kategoria saláriu no vensimentu $793.295, bens no servisu $548.507, kapitál menór $1.626.301, kapitál dezenvolvimentu  $7.243.065.

“Ami foku ba planu ordenamentu atubele hamosu Planu Nasionál Ordenamentu Territoriál tanba planu ne’e maka sei orienta ita ba prosesu dezenvolvimentu nasionál ne’ebé integradu no sustentável,” Vise Primeiru-Ministru (PM) no Ministru Planu no Ordenamentu, José Maria Reis hateten iha ámbitu audénsia públika konjunta sala plenária iha Parlamentu Nasionál (PN), kuarta ne’e.

Tuir livru orsamentu, MPO iha programa prinsipál hitu maibé sei foku liu atu estabelese PNOT ho alokasaun orsamentu $3.781.544.

Programa ne’e estabelese polítika ordenamentu territóriu, ordenamentu kosteira, planeamentu territoriál, informasaun  jeográfika no kartográfika atu promove koesaun nasionál no asegura simultáneu defeza no valoriza patrimóniu kulturál no naturál.

Alokasaun orsamentu ba programa hitu maka hanesan programa garantia kualidade implementasaun no ezekusaun projetu ho alokakasaun orsamentu $2.291.800, implementasaun polítika jéneru  $15.000 , programa boa governasaun no jestaun institusionál $1.714.795, programa koordenasun estratéjia desenvolvimentu médiu no longu prazu $1.508.667, programa Planeamentu no Dezenvolvimentu Integradu Munisipál (PDIM) $4.695.006, programa implementasaun projetu liña ministeriál ba sob kontrolu diretu Ajénsia  Dezenvolvimento Nasionál (ADN)  $1.204.356.

 “Ami kompremetidu atu hamosu planu ordenamentu territorál iha mandatu tinan tolu hodi bele fó diresaun ba dezenvolvimentu nasionál,” Vise PM ne’e kompromete.

Atu hamosu planu ne’e, governante ne’e dehan, sei kontinua estudu sira hanesan planu urbanizasaun Dili no hahú levatamentu  ordenamentu teritórriu ih munisípiu Bobonaro, Baucau, Ermera, Lautem no Viqueque.

“Ami foku aprezentasaun legál atu suporta lei baze ordeanementu territóriu atubele komplementa iha lei PNOT, nune’e ami prepara hela rejime tolu atu fulan oin ami bele hatama ba Konsellu Ministru,” nia akresenta.

PNOT no Planu Dezenvolvimentu Estratéjiku Nasionál (PDEN) bele fó diresaun atubele hahú dezenvolvimentu nasionál, liuliu  planu nasionál ordenamentu territoriál bele konspira liu bainhira halo revizaun ba PDEN.

“Ita iha faramente barak ne’ebé durante ne’e hala’o hanesan estudu ba Planu Nasionál Ordenamentu territóriu, ne’ebé iha dadus jeolojia no iha matéria lubuk ida ne’ebé ajuda tebes aselera  planu nasionál ne’e,” governante ne’e hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here