Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 08 juñu 2020 (TATOLI) – Atu diskute Dekretu-Lei tolu ne’ebé relasiona ho Planu Urbanu hanesan Lei Jestaun Territoriál, Klasifikasaun Uzu Solu no Urbanizasaun inklui Edifikasaun Urbanu, Ministériu Obra Públika (MOP) sei koordena ho Ministériu Planu Ordenamentu Territóriu (MPOT) hafoin aprova iha nível ezekutivu.

“Ita hein Vise Primeiru-Ministru ho Ministru Planu Ordenamentu Territóriu mai no asume kargu maka ami koordena malu hodi diskute dekretu-lei ne’e tanba polítikamente ne’e ministru tutela mak halo,” tenik Ministru Salvador ba Agência Tatoli, iha Comoro, segunda ne’e.

Iha loron 13 maiu 2020, Primeiru-Ministru, Taur Matan Ruak aprezenta ba Konsellu Ministru, projetu dekretu-lei ba alterasaun dahuluk dekretu-lei númeru 14/2018 17 agostu, kona-ba Orgánika VIII Governu Konstitusionál.

Iha alterasaun orgánika ne’e hamosu MPOT, ho nune’e, Ministru Obra Públika, Salvador Eugênio Soares dos Reis Pires, hateten atu kontinua dekretu lei tolu ba urbanu ne’e sei halo koordenasaun ho ministru tutela hafoin kontinua hala’o diskusaun iha nível ministeriál hafoin aprova iha nível ezekutivu sira atu halo planeamentu urbana Timor-Leste ninian.

Maski, MOP aprezenta ona dekretu-lei tolu ba Konsellu Ministru hodi distribui ba kada ministrériu atu fó kometáriu, maibé presiza koordena malu hafoin diskute ezbosu lei tolu ne’e.

Ho nune’e, Salvador iha esperansa atu hala’o koordenasaun ho liña ministériál sira, liuliu MPOT atu haree artigu balun labele kontradiz ho lei ne’ebé iha ona.

Nia dehan, molok ne’e, lei ne’e aprova ona iha VI Governu Konstitusionál liuhosi Ministériu Planeamentu no Investimentu Estratéjiku (MPIE).

“Kuandu lei tolu ne’e aprova, ita bele halo planeamentu urbanu no mór regulamentu ki’ik-oan sira hodi kontrola ema hela dook iha estrada oinsá no ita bele organiza sidade. Entaun ida-ne’e mak ita tenke iha uluk,” nia akresenta.

Kona-ba espesífiku baze instrumentu sira ne’e, baze legál bele estabele hodi sustenta asaun planeamentu urbanu no mós regula kreximentu ambiente fíziku ne’ebé sidadaun sira instala iha sidade.

Nune’e mós, ba jestaun movimentu transporte no tráfiku, tuir ministru ne’e kabe ba kapasidade Ministériu Transporte no Komunikasaun (MTK) maibé ho vizaun presiza melloramentu rede estrada no ponte atu fasilita movimentu.

Entretantu, rezultadu progresu servisu MOP iha tinan-2019 iha área Abitasaun no Planeamentu Urbanu maka hanesan programa atu harii uma ho unidade 4.000 iha sidade Dili, estudu pre-viabilidade no identifikasaun sítiu kompletu ona no tama faze negosiasaun ho parseiru internasionál hanesan International Finance Corporation (IFC) no parséiru dezenvolvimentu sira atu dezenvolve estudu no dezeñu ho modalidade PPP (Parseiru Públiku Privadu).

MOP hahú Estabelese enkuadramentu legál sira no planeamentu urbanu ba sidade Dili no munisípiu hodi promove lei tolu hanesan Planeamentu Territoriál, Edifikasaun Urbanu, no Kualifikasaun no Klasifikasaun Uzu Solu.

Ministériu ne’e mós estabelese ona akordu ho parseiru dezenvolvimento hanesan Organizasaun Nasaun Unida (ONU) ba asuntu abitasaun hodi apoiu harii planeamentu territoriál ba Dili no prosedimentu kontrolu dezenvolvimentu fíziku no lansa ona konkursu ba estudu revitalizasaun Aitarak-Laran no polu dezenvolvimentu ba Batugade no munisípiu seluk.

Aleinde ne’e, MOP mós hala’o ona revizaun kustu unitáriu ba konstrusaun Eskola Vokasionál Politékniku no Akademia Peska iha Betano, Manatuto no Lautém no Estudu Planu Mestre ba Hospital Nacional Guido Valadares (HNGV), Ospitál Lahane no Sidade Universitáriu iha Munisípiu Aileu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here