Sekretária Meza Parlamentu Nasionál, Deputada Norberta Soares Martins, akompaña hosi Vise-Sekretária Meza PN Deputadu António Nobre Tilman no Segundu Vise-Sekretária, Deputada Regina Freitas, informa liuhosi konferénsia imprensa kona-ba atividade parlamentár semanál nian. Imajen TATOLI/Evaristo Soares Martins.

DILI, 20 novembru 2020 (TATOLI)—Relasiona ho petisaun jornalista na’in-31 halo Parlamentu Nasionál (PN) kontinua adia eleisaun ba membru Conselho de Imprensa (CI) tanba Komisaun (A) presiza esklaresimentu kona-ba prosesu eleisaun Asosiasaun Jornalista Timor-Leste (AJTL) ne’ebé hili ona Virgílio Guterres ba iha Conselho de Imprensa.

Notísia Relavante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

“Kona-ba eleisaun ba Conselho de Imprensa ne’e pendente hela, nusá mak buat ne’e adia hela de’it. Tanba Gabinete Prezidente Parlamentu Nasionál nian no mós Komisaun A simu keixa ka protesta balun hosi jornalista sira relasiona ho kandidatu balun ba Conselho de Imprensa. Entaun, Komisaun A ninia kompeténsia mak husu esklaresimentu mós ba maluk ida-ne’ebé mak jornalista hanoin presiza hetan esklaresimentu ruma. Entaun, Komisaun A haruka tiha ona karta ba señor Virgílio Guterres,” Sekretária Meza Parlamentu Nasionál, Deputada Norberta Soares Martins, informa liuhosi konferénsia imprensa, iha sala GMPTL, Parlamentu Nasionál, sesta ne’e.

Bainhira Virgílio Guterres fó ona resposta ba rekomendasaun Komisaun A nian hafoin Parlamentu Nasionál fixa eleisaun ba Konsellu Imprensa.

“Pendente ne’e dehan katak ita hein lai informasaun balun hosi ema-ne’ebé jornalista keixa ba ne’e nune’e kompleta liután prosesu ida-ne’e,” nia dehan. 

Komisaun A lideradu Deputadu Joaquim dos Santos, hato’o pedidu ba Virgílio Guterres ne’ebé reprezenta jornalista hosi Asosiasaun Jornalista Timor-Leste (AJTL) ba Konsellu Imprensa ne’e atu fó resposta durante loron 15.

Iha loron 9 jullu 2020, Jornalista na’in-31 hatama petisaun ba Prezidente Parlamentu Nasionál, Aniceto Longuinhos Guterres Lopes tanba kestiona kestiona legalidade hosi eleisaun ne’ebé Konsellu Imprensa organiza iha loron 4 fulan-jullu 2020, iha Delta Nova, Dili.

Petisaun ne’e hato’o ba Prezidente Parlamentu Nasionál, Aniceto Longuinhos Guterres Lopes, Prezidente Tribunál Rekursu, Deolindo dos Santos, Ministru Asuntu Parlamentár no Komunikasaun Sosiál, Francisco Jeronimo no Sekretáriu Estadu Komunikasaun Sosiál, Merício Juvenal dos Reis Akara.

Notísia Relavante: PPN Sei Konsulta ho Asesór Legál Kona-ba Petisaun Jornalista 31

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here