Prezidente Parlamentu Nasionál, Aniceto Longuinhos Guterres Lopez.

DILI, 15 jullu 2020 (TATOLI)—Prezidente Parlamentu Nasionál (PPN), Deputadu Aniceto Guterres, sei konsulta ho asesór legál parlamentu nian molok foti desizaun ba petisaun jornalista na’in-31 tanba petisaun ne’e presiza trata ho regra rejimentál.

Notísia Relevante: Jornalista Na’in-31 Hatama Petisaun Ba PPN Tanba Kestiona Legalidade Prosesu Eleisaun

“Ha’u simu tiha ona (petisaun hosi jornalista na’in-31). Ha’u sei rona lai pareser hosi asesór sira hodi trata halo nusá. Tanba iha regra ketak ida ba buat ida bolu petisaun ne’e. Ne’ebé, tenke la’o tuir regra rejimentál prosesu atu trata petisaun,” dehan Deputadu Aniceto Guterres ba jornalista sira iha Parlamentu Nasionál, kuarta ne’e.

Prezidente Parlamentu Nasionál ne’e fó-sai katak, kualkér petisaun ne’e tama tenke trata tuir regra rejimentál nian.

Tuir Rejimentu Parlamentu Nasionál (RPN) artigu 155 (Ezersísiu direitu ba petisaun) alínea 1, hateten direitu ba petisaun ne’ebé prevee iha artigu 48 hosi konstituisaun no iha lei, ne’e ezerse liuhosi petisaun, reklamasaun ka keixa, ne’ebé aprezenta ba Parlamentu.

Alíena 2 hosi artigu ne’e esplika, bainhira de’it temi liafuan “petisaun”, signifiKa katak liafuan ne’e aplika ba modalidade hotu-hotu ne’ebé temi iha númeru anteriór.

Entretantu artigu 156 (Forma) alínea 1 esplika, petisaun tenke hakerek no iha identifikasaun hosi ninia titulár ho nia hela-fatin, na’in tenke asina ka ema seluk mak asina, tanba nia husu, bainhira labele asina ka la hatene asina.

Alínea 2 hosi 156 ne’e hateten, petisaun tenke kompreensível no espesifika momoos ninia objetu. Alínea 3 subliña, petisaun ne’ebé iha autor lubuk ida, natoon ona identifikasaun husi signatáriu ida de’it.

Nune’e mós Konstituisaun RDTL artigu 48 (Direitu petisaun nian) sidadaun hotu-hotu iha direitu atu aprezenta petisaun, kesar no reklamasaun, mesak-mesak eh iha grupu, ba órgaun soberania sira, eh ba autoridade selu-seluk atu defende sira-nia direitu, Lei-Inan, lei-oan eh ba interese ema hotu nian.

Notísia Relevante: AJTL Husu PN Atu Anula Petisaun Jornalista 31

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here