Embaixadór Timor-Leste ba Japaun, Ilídio Ximenes da Costa, kaer liman ho eis Embaixadór Japaun ba Timor-Leste, I Wao Kitahara. Imajen/Embaixada TL ba Japaun

DILI, 20 movembru 2020 (TATOLI)—Embaixadór Timor-Leste ba Japaun, Ilídio Ximenes da Costa, husu klarifikasaun ba Bankada Frente Revolusionária Timor-Leste (FRETILIN) ne’ebé ejize Governu atu ezonera nia hosi nia kargu nu’udar embaixadór.

Notisia Relevante: Bankada FRETILIN ezije atu ezonera Embaixadór Ilídio Ximenes

Ilídio Ximenes da Costa fundamenta, nia parte la komete sala ruma tanba durante nia hala’o knaar hanesan reprezenta Estadu no Governu hodi hatuur interese nasionál aas liu no la’ós halo servisu partidu nian iha Japaun.

“Kona-ba desizaun ezenorasaun, ha’u tenke hatene ha’u-nia sala ne’e saida loos nai deputadu sira. Se iha duni sala ruma, ha’u prontu atu kumpre saida de’it mak Governu fo no foti. Ha’u hala’o ha’u-nia kna’ar hanesan reprezenta Estadu no Governu hatuur interese nasionál aas liu do que grupu no individu. Ha’u la’ós halo servisu partidu nian iha Japaun tuir saida mak nai deputadu sira dehan,” Embaixadór Ilídio Ximenes da Costa informa ba Agência TATOLI, liuhosi email, kinta kalan.

Eis Sekretáriu Estadu Polítika Formasaun Profesionál no Embregu ne’e ne’e dehan, tuir loloos Timor-Leste sente orgullu tanba hetan konvite espesiál hosi Parlamentu Nasionál Japaun nian.

Embaixadór Ilídio hakfodak ho reasaun hosi deputadu sira kona-ba postingan kona-ba Xanana  Gusmão ne’ebé hetan konvite hosi Tokyo Parliamentary Peace Forum, organiza hosi Parliamentary Committee of The Diet of Japan and Japan Commission on Global Governance iha loron 23 juñu 2020, hodi komemora tinan 75th UN ninian ho tema sentrál mak “The Role of the UN and Japan in the Post Corona Era in Addressing Global Treat and Challenges”.

Konferénsia internasionál ne’e hala’o iha fatin konferénsia Uma Fukun PN Japaun iha 18 novembru 2020.

“Konvite ne’e hato’o ba Maun Boot Xanana hanesan Eis Prezidente Repúblika, Eis Primeiru Ministru no pesoál Emenente G7+ atu fahe esperiénsia kona-ba Timor-Leste ninia susesu iha post conflict, rekonsiliasaun no fronteira marítima,” nia fundamenta.

Ilídio Ximenes argumenta, konvite ne’e embaixada hato’o ba Xanana Gusmão liuhosi Diretór Jerál MNEK Domingos Savio, Diretór Joaquim Chaves no Sekretáriu Jerál MNEK Jorge Camões.

“Ita Timor-Leste rai ki’ik maibé naran morin no boot tanba  ho susesu sira-ne’e, liuhosi kria relasaun diplomátiku no amizade ho membru Parlamentu Nasionál Japaun no ema hanesan profesór Hasegawa no sira seluk iha Japaun. Maun Boot haruka vídio gravadaun hosi Dili mai Tokyo iha loron 13 novembru, no vídio ne’e fó-sai hamutuk vídio hosi UN no Komisaun Eropeia nian,” nia dehan. 

Diplomata ne’e fó-sai katak, audénsia no partsipante mak membru Parlamentu Nasionál Japaun nian, akadémiku, Governu no sosiedade sivíl sira.

“Buat ne’ebé Embaixada halo daudaun ne’e parte ida hosi misaun diplomata nia mak promosaun, lori Estadu no Governu ba mundu katak ita Timor-Leste mós iha buat ida mak ita halo susesu no buat balun mós sei presiza Japaun nia tulun mai ita-nia povu,” nia salienta.

Atrai investidór

Embaixadór ne’e fundamenta liután, progresu servisu nu’udar diploma durante iha Japaun mak hanesan Japaun ajuda maka’as iha COVID 19, programa vanila ne’ebé Japaun iha grupu balun interese atu dezenvolve no sosa, investidór balun hatán atu halo investmentu otel maibé peresiza iha direct flight.

“Iha tawaran mai ita atu halo karreta api Timor Barat  mai Timor Leste. Iha mós atu halo investimentu ba indústria peska maibé presiza dadus kona-ba ikan saida de’it mak ita iha, iha ona sidade balun hatán atu halo sister city, foin daudaun hetan organizasaun ida-ne’ebé atu bolsu estudu ba ema na’in-rua kada tinan liuhosi Madre sira (Asian Scholarship),” nia hateten.

Nune’e mós simu, nia dehan, ema atu tuir formasaun kaer ikan tuna iha sidade Ichigaki, Japan International Research Center for Agricultural (JIRCAS) prontu atu koopera ho parte peskiza iha MAP-TL nian, iha empreza balu hakarak dezenvolve Sentru Formasaun Tibar no restu sei hatutan nafatin programa ne’ebé uluk iha nanis ona.

Notisia Relevante: Bankada CNRT lakohi komenta ba ezonerasaun Embaixadór Ilídio Ximenes

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here