Xefe Bankada CNRT, Duarte Nunes. Imajen/Egas Cristovão

DILI, 19 novembru 2020 (TATOLI)—Xefe Bankada Congresso Nacional de Reconstrução de Timor (CNRT), Deputadu Duarte Nunes, hateten maski laiha razaun atu hasai ema ida maibé partidu Frente Revolusionária Timor-Leste Independente mak kaer ukun entaun bele halo ezonerasaun ba kuadru partidu seluk nia ema.

Notísia Relevante: Bankada FRETILIN ezije atu ezonera Embaixadór Ilídio Ximenes

Xefe Bankada CNRT lakohi komenta liután ba asuntu FRETILIN ezije ba Governu atu ezonera Ambaixadór Timor-Leste ba Japaun, Ilídio Ximenes da Costa, tanba sei hein Governu ezonera tiha mak bele fó komentáriu.

“Ema mak manda ne’e ita atu ko’alia saida. Sira mak manda no sira mak ukun ne’e ezonera de’it ba. Ne’e hatudu sira hanorin buat barak ba ema. Sira ezonera tiha mak ita komenta, sira la gosta ema hodi hasai de’it ema, ne’e mós razaun ida. Sira halo tiha ba mak ita haree, razaun saida mak sira ezonera. Bankada CNRT lakohi komenta ba suntu ne’e,” Xefe Bankada CNRT, Deputdu Duarte Nunes, informa ba jornalista sira iha Dili, kinta ne’e.

Xefe Bankada CNRT lakohi komenta liután tanba sei hein Governu ezonera tiha Embaixadór Ilídio Ximenes mak bele fó komentáriu.

Entretantu, Xefe Bankada FRETILIN, Deputadu Francisco Miranda Branco, ezije Governu halo ezonerasaun ba Embaixadór Ilídio Ximenes da Costa tanba públika iha facebook kona-ba “Xanana ko’alia iha ámbitu Parliamentary Peace Forum  Commemoration of the 75th Aniversary of the United Nations “The Role of the United Nations and Japan in the Post-Corona”.

“Razaun ami husu ezonera tanba ita-boot sira mós hatene, nusá mak husu tan. Buat ne’e, nia publika iha loron 18 novembru 2020 horisehik maibé sistematikamente ami akompaña nia atividade sira-ne’e, ne’ebé orientadu ba grupu nian la’ós lori Estadu Timor-Leste nia interese. Tanba ne’e mak ami ezije halo ezonerasaun,” Xefe Bankada FRETILIN, Francisco Miranda Branco, informa liuhosi konferénsia imprensa, kinta ne’e.

Bankada FRETILIN konsidera atividade ne’ebé embaixadór Ilídio Ximenes da Costa partilla liuhosi rede sosiál ne’e hanesan kampaña ajenda polítika.

“Mídia sosiál ne’e saida. Reprezentante Estadu nian bele tau ka partilla iha-ne’ebá hodi halo kampaña,” Xefe Bankada FRETILIN ne’e kestiona.

Nia haktuir, iha tinan rua bainhira Marí Alkatiri nu’udar Prezidente RAEOA-ZEESM, hala’o vizita ida ba Kupang bazeia ba konvite Governadór Nusa Tengara Timur (NTT).

“Entaun ita-nia konsultadu iha-ne’ebá ba simu Prezidente Autoridade, Ministru Negósiu Estranjeiru no Kooperasaun iha momentu ne’ebá ezonera kedas konsuladu ne’e (agora Ministru Asuntu Parlamentár no Komunikasaun Sosiál), ne’e iha presedente forte,” Xefe Bankada FRETILIN ne’e fundamenta.

Jornalista: Evaristo Soares Martins

Editór: Cancio Ximenes    

HAKEREK NO HATÁN

Please enter your comment!
Please enter your name here