DILI, 19 novembru 2020 (TATOLI)—Bankda Frente Revolusionária Timor-Leste Independente (FRETILIN) ezije Governu atu ezonera Embaixadór Timor-Leste ba Japaun, Ilídio Ximenes da Costa, tanba deskonfia halo atividade partidu nian.
“Bankada FRETILIN kondena severamente actos hosi Embaixadór Repúblika Demokrátika Timor-Leste ba Japaun, ne’ebé hatuur aas liu interese grupu ka partidu liu fali interese Estadu. Tanba ida-ne’e, ami ejize ezonerasaun imediata ba embaixadór Timor-Leste iha Japaun, hodi troka ho diplomata seluk ne’ebé bele reprezenta Estadu Timor-Leste ho dignu,” Xefe Bankada FRETILIN, Deputadu Francisco Miranda Branco, informa liuhosi Konferénsia Imprensa, iha sala Bankada FRETILIN iha Parlamentu Nasionál, kinta ne’e.
Bankada FRETILIN kondena severamente atitude embaixadór Timor-Leste ba Japaun tanba iha nia srvisu nu’udar embaixadór hatudu aktos (atu) ne’ebé la reprezenta Estadu maibé reprezenta fali grupu ka partidu.
Xefe Bankada FRETILIN ne’e hateten, Embaixadór Repúblika Demokrátika Timor-Leste ba Japaun ka ba nasaun ne’ebé de’it hanesan reprezentante Estadu iha nasaun refere. Relasaun diplomátika estabelese relasaun Estadu ho Estadu, la’ós relasaun individu ho Estadu.
“Embaixadór mak detein plenos podér ba reprezenta Estadu, goza previléjiu sira no imunidade nu’udar reprezentante estadu. Embaixadór nia mandatu atu reprezenta estadu Timor-Leste iha Japaun, maibé realidade hatudu katak embaixadór ida-ne’e la’ós reprezenta Estadu Timor-Leste maibé reprezenta fali grupu no partidu. Liuliu rekursu estadu nian hodi halo fali ajenda partidu nian,” Xefe Bankada FRETILIN hateten.
Jornaista sira husu sá razaun mak Bankada FRETILIN husu halo ezonerasaun ba Embaixadór ba Japaun ne’e, maibé Xefe Bankada FRETILIN dehan de’it uluk situasaun ne’e mosu ba kuadru FRETILIN nian.
Jornalista: Evaristo Soares Martins
Editór: Cancio Ximenes
Parabens