DILI, 18 novembru 2020 (TATOLI) – Jogu kontinuasaun Pra Liga futeból salaun (Futsal) Timor-Leste (PLFTL) ne’ebé hala’o, ohin kalan, iha salaun futsal Kuartél Jenerál FALINTIL-Forsa Defeza Timor-Leste (F-FDTL) iha Fatuhada, Dili, ekipa FC Coelho “lulun” Kablaki FC ho golu 5-1.
Notísia Relevante : Pra Liga Futsal Timor-Leste, Mushila hurulele FIEL 4-2
Iha primeiru jogu minutu 3 de’it jogadór FC Coelho, Frangelino Memo marka golu primeiru hodi lees rede Kablaki FC nian lori rezultadu ba 1-0. Hosi golu ne’e halo Kablaki nia fuan la hakmatek hodi lansa atake ne’ebé maka’as ba Coelho, nune’e iha minutu 5, Marcos Salgario jogadór hosi Kablaki fura golu ida ba guarda rede Coelho nian hodi hatuur pozisaun 1-1.
Ho rezultadu empata, provoka ekipa rua nia emosaun hodi halo kontra atake ba malu maka’as liután. Nune’e, iha minutu 17 jogadór Antonio Noni hosi Coelho konsege lansa tan golu ida hodi muda rezultadu ba 2-1.
Iha fali minutu 19, Frangelino Memo hosi FC Coelho hatama tan nia golu segundu hodi hasae rezultadu ba 3-1. Iha minutu 24, Antonio Noni hatama tan golu ida hodi lori rezultadu ba 4-1.
Iha fali minutu 34, jogadór Coelho nian hametin tan nia vitória liuhosi golu ne’ebé kontribui hosi João Nito, hodi lori pozisaun rezultadu ba 5-1.
Notísia Relevante : Pra Liga Futsal Timor-Leste, Jerman FC manan Estrela Baguia 3-1
Jornalista : Hortencio Sanchez
Editór : Francisco Simões
