Imajen/PLFTL

DILI, 17 novembru 2020 (TATOLI) – Ekipa futeból salaun (Futsal) Jerman FC susesu halakon nia adversáriu Estrela Baguia ho golu 3-1.

Iha jogu Pra Liga Futsal Timor-Leste (PLFTL) ne’ebé hala’o iha kampu Futsal Kuartél Jenerál FALINTIL-Forsa Defeza Timor-Leste (F-FDTL) iha Fatuhada, Dili, ohin loraik, jogadór Micho hosi Jerman FC  “oferese” golu ida iha minutu da-hituk hodi loke oportunidade ba Jerman FC atu “kombate” nia adversáriu Estrela Baguia.

Iha minutu primeira parte, ekipa rua lansa kontra-atake ho ida-idak nia tékniku no abilidade halimar bola kabuar iha kampu laran. Maibé ekipa Jerman FC solidu liu hodi oferese tan golu ida iha minutu 31 liuhosi Joanico CS hodi dudu score 2-0 ba Estrela Baguia.

Ritmu jogu manas liután tanba ekipa Jerman FC halo presaun maka’as ba ekipa Estrela Baguia iha minutu 33 ne’ebé rezulta tan golu ida hosi Agy hodi “siga” ka tonka eskore Jerman FC sai 3-0.

Iha minutu 38, jogadór Estrela Baguia, Wilson Menezes, uza oportunidade hodi halo duni golu ida hodi dudu eskore sai ba 3-1. Nune’e, ekipa ekipa Jerman komesa muda nia estratéjia hosi jogu avansa no halo presaun ba defensiva.

Estratéjia ne’e lori duni rezultadu di’ak ba Jerman FC tanba to’o jogu termina mós Estela Baguia la konsege fura tan golu ba guarda rede Jerman FC. Ho nune’e, to’o jogu termina Jerman FC manan duni Estrela Baguia ho golu 3-1.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here